O pasado xoves, en Maputo (Mozambique), tivo lugar o lanzamento do proxecto de cooperación universitaria ao desenvolvemento Kaya Clinica (“clínica das casas” en lingua xangana).
O proxecto, impulsado pola Universidade Eduardo Mondlane de Mozambique en colaboración coa Universidade da Coruña, está financiado pola Axencia Española de Cooperación Internacional para o Desenvolvemento (AECID) con 74.824 euros para un período de execución de 18 meses.
No lanzamento do proxecto estiveron presentes a coordinadora xeral da cooperación española en Mozambique, Cristina Gutiérrez; os socios locais, encabezados polo coordenador do proxecto en Maputo Luis Lage, Plácido Lizancos (profesor da ETS de Arquitectura) e Vanessa Míguez (técnica da Oficina de Cooperación e Voluntariado), dúas das persoas que dirixen o proxecto na UDC xunto con Alberto Varela.
O proxecto Kaya Clinica vai executar un sistema de aprendizaxe – servizo para o alumnado, enfocado á habitabilidade integral (auga, saneamento e mellora da habitabilidade), que se inicia nun dos barrios informais da capital mozambicana, Dimitrov, situado ao norte da cidade.
O proxecto implica as facultades ou escolas de Arquitectura, Enxeñaría, Dereito, Letras e Ciencias Sociais, Medicina e Economía da Universidade Eduardo Mondlane, e as escolas de Arquitectura e de Enxeñaría de Camiños da UDC, así como a Oficina de Cooperación e Voluntariado.
