A axencia de Turismo de Galicia, dependente da Xunta, confirmou a retirada da fotografía na que se empregaba a antiga mina e canteira de Monte Neme, entre Carballo e Malpica, como reclamo turístico para visitar Galicia. Esta explotación, na que se produciu en febreiro de 2014 unha rotura dunha balsa de residuos, segue pendente dun plan de rexeneración que a propia Xunta se comprometeu a impulsar.
Desde Turismo recoñecen o “lamentable erro” da utilización de Monte Neme na campaña “Dáme Galicia”. Explican que as imaxes e vídeos escollidas nesta promoción turística son seleccionadas directamente pola axencia de publicidade encargada da campaña. Entre elas, figuraba a controvertida fotografía de Monte Neme. “En canto nos demos conta do erro, retiramos a imaxe de todos os soportes”. Confirman que “fallaron os filtros“.
A campaña “Dáme Galicia” baséase na recolección de experienciais reais de xente que pasou as súas vacacións en Galicia. Por isto, desde Turismo remarcan que non foi a Xunta a que realizou as imaxes e vídeos, senón que foron solicitadas aos propios turistas, despois de seren publicadas nas redes, por medio da axencia encargada da publicidade.
Información relacionada (9-10-17)
medioambiental/xunta-mina-monte-neme-turismo/
