Luns 15 Xullo 2024

A Xunta tardaría 1.782 anos, ao ritmo actual, en protexer todas as especies ameazadas de Galicia

Hai case once anos, o 19 de maio de 2007, o Diario Oficial de Galicia publicaba o decreto que regulaba o Catálogo Galego de Especies Ameazadas. Unha lista de 193 especies (ás que en 2011 se engadirían sete máis) que estaban en perigo de extinción ou nunha situación vulnerable no noso territorio. Ademais da enumeración das especies catalogadas, o decreto indicaba que cada especie debería contar con cadanseus plans de recuperación – no caso de que estuveran en perigo de extinción – ou de conservación, no caso das ameazadas.

Máis de 3.500 días despois, só tres das 200 especies (o 1,5%) contan cos preceptivos plans. Dous deles de recuperación; un dunha ave (escribenta das canaveiras) e outro dun réptil (o sapoconcho común) e un de conservación (píllara das dunas). Os tres aprobáronse entre 2013 e 2014. Neses anos tamén estivo sobre a mesa o borrador do plan de recuperación do oso pardo, pero aínda segue sen aprobar, gardado nun caixón.

Publicidade

Así, a este mesmo ritmo, serían precisos 1.782 anos, case 18 séculos, para desenvolver os plans conservación e recuperación de todas as especies. “É un incumprimento detrás de outro”, lamenta Serafín González, científico do CSIC e presidente da Sociedade Galega de Historia Natural. González lembra que “na época do bipartito na Xunta xa había 22 documentos entregados con cadanseu plan de conservación, contratados e pagados”, listos para aprobar. Hoxe en día habería que volver a redactalos, “porque moitos están xa desactualizados“.

45 plans antes de 2020?

Hai un ano, o presidente da Xunta, Alberto Núñez Feijoo, anunciou o inicio da tramitación da nova Lei de Patrimonio Natural. Naquela comparecencia, Feijoo afirmou que o obxectivo da Xunta era que antes do 2020, 45 especies en situación vulnerable ou en perigo de extinción contasen co seu plan de recuperación. Desde entón, ningún novo plan entrou en vigor, aínda que a Xunta encargou xa estudos a varios grupos de investigación para desenvolver algúns destes plans, segundo puido saber GCiencia.

Publicidade

Ante esta situación, Serafín González confía na boa vontade da Xunta. “Oxalá fose así“, desexa. Con todo, recoñece que o ritmo, aínda así, non sería demasiado elevado. “Daríanos un promedio de 45 especies en 13 anos, polo que, facendo cálculos, farían falta 44 anos para cumprir co decreto de 2007″, sentenza.

O decreto contempla tamén a posibilidade de desenvolver plans integrais “naqueles supostos en que dúas ou máis especies ameazadas coexistan nun mesmo tipo de hábitat e requiran a adopción de medidas análogas de conservación ou protección ou ben existan razóns ecolóxicas que así o aconsellen”. Non en tanto, tampouco se impulsou ningún plan integral ata o de agora.

Incumprimento dos plans xa feitos

A isto hai que engadir, segundo o presidente da SGHN, os problemas co cumprimento dos plans xa feitos. “Non é só que non se fagan novos plans, senón que os tres que xa están feitos incúmprense de xeito reiterado; e nin hai orzamentos claros nin unha intervención decidida”. González denuncia, por exemplo, que desde a Dirección Xeral de Patrimonio Natural se autorizaron axotamentos de xabarís no carrizal de Dodro, unha das zonas clave para as crías de escribenta das canaveiras. A propia SGHN presentou tamén alegacións contra un proxecto para construír un embarcadoiro e unha praia fluvial na mesma zona.

No tocante ao sapoconcho, o científico sinala que nas Gándaras de Budiño, en Porriño, outra zona de importancia capital para unha especie en perigo de extinción, concedéronse permisos para extraer áridos e cubrir de terra e rochas nalgunhas das pozas onde vivía o sapoconcho.

Estas son algunhas das especies en perigo de extinción en Galicia sen plan de recuperación:

Mexillón de río (Margaritifera margaritifera)

Caranguexo de río (Austropotamobius pallipes

Pita do monte (Tetrao urogallus)

– Oso pardo (Ursus arctos)

3 COMENTÁRIOS

  1. Ola,
    Estou desolado,logo de ler o informe…Urxe unha resposta colectiva dende os pobos do país.
    Saúdos
    Lourenzo

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Os desafíos de descontaminar o lindano no Porriño: “Hai concentracións de ata 600 veces por riba do límite”

Dende a Consellería de Medio Ambiente e Cambio Climático aseguran que o proxecto comezará a principios de verán

Unha obra no río Miño afecta a dúas especies vulnerables e pon en alerta os ecoloxistas

A restauración dun caneiro en Acea de Olga, na cidade de Lugo, obriga a trasladar a dúas poboacións de bivalvos ameazadas

Un equipo da UVigo constata que o granulado ten aditivos con "toxicidade crónica" e irritantes para os ollos

O grupo liderado por Ricardo Beiras analiza un dos informes encargados pola Xunta para coñecer a composición das bólas plásticas

As autoridades descoñecen os aditivos químicos dos plásticos un mes despois da vertedura

O único dato oficial sobre as bólas é que están feitas de polietileno, o plástico máis común, pero aínda non se sabe que outras substancias conteñen