“É a primavera, non hai moito máis que dicir”, expón desde MeteoGalicia Alberto Romero. Porén, non deixa de sorprender a gran variación de temperaturas que Galicia experimentará en apenas dous días. Así, as predicións apuntan a que cidades como Ourense, nas que se chegou aos 35ºC esta semana, queden con máximas por debaixo dos 20ºC. E mesmo nas montañas máis altas se verá a neve: na noite do venres poderían caer folerpas por riba dos 1.200 metros en Ancares e O Courel.
“Estamos nunha situación que é habitual nestas alturas de ano – explica Romero -, unha loita de masas de aire quente coas frías. O anticiclón que tivemos estes días estase movendo cara ao leste, a Centroeuropa, e ocupa o seu lugar unha masa fría e húmida que se descolga desde Islandia”.
Bos días! Continúa a estabilidade en #Galicia pero na secuencia do Meteosat 🛰️vemos as nubes achegándose polo Atlántico. No litoral temos xa a néboa que nos anticipa o cambio de tempo, que entre hoxe e mañá se notará en toda a Comunidade, cun importante descenso da temperatura 📉 pic.twitter.com/UZWybARWcf
— MeteoGalicia (@MeteoGalicia) 15 de maio de 2019
Como produto disto chegarán a inestabilidade atmosférica e a baixada forte de temperaturas. Así, mentres que na mañá deste mércores xa se superaron os 25ºC antes do mediodía en lugares como Antas de Ulla ou Lalín, o venres e o sábado farán falta as chaquetas: a predición apunta a que en lugares como Santiago, Lugo, ou Ferrol non se superen os 15ºC.
Con todo, parece que para a vindeira semana os modelos apuntan á recuperación da infleuncia anticiclónica, con ceos máis despexados e subida de temperaturas.
Máis de 35ºC en Ourense
A baixada xeral de temperaturas chega despois de acadarse valores de máis de 35ºC, sobre todo na provincia de Ourense. Así, segundo a Aemet, a estación de Ribadavia marcou este martes 35,1 ºC, a segunda temperatura máis alta rexistrada en España, nunha lista ocupada na súa maior parte por localidades de Andalucía e Extremadura. Non en tanto, os máximos non son absolutos deste mes, xa que as estacións da Aemet e MeteoGalicia teñen medido máis de 37ºC noutros anos.
