Venres 29 Marzo 2024

A madeira de frondosas galegas, idónea para a elaboración de barrís

Unha tese proba que o castiñeiro galego presenta propiedades semellantes ás do carballo de orixe francesa ou americana que o fan adecuado para o seu uso en destilería

Unha tese de doutoramento, elaborada na Universidade de Santiago de Compostela (USC), demostra a idoneidade da madeira galega de frondosas para a elaboración de barrís e contribúe así á optimización do deseño de toneis empregados en destilería. A enxeñeira de Montes Adriana Conde Fernández determina tamén no seu estudo os erros nas fórmulas empíricas tradicionais.

A madeira empregada pola industria toneleira é unha materia prima de alta calidade e gran valor, aínda cando a fabricación de barricas a día de hoxe continúa a ser unha actividade artesanal case por completo. Daquela, as pescudas desenvolvidas por Adriana Conde e compiladas na súa tese de doutoramento, pretenden ser un primeiro paso na mellora do proceso produtivo, a fin de facelo máis eficiente a partir da optimización do deseño dos toneis e da determinación da idoneidade do material empregado.

Publicidade

As propiedades da madeira

O estudo realizado por Adriana Conde, investigadora na Escola Politécnica Superior de Enxeñaría do Campus Terra da USC, céntrase na análise das propiedades físico-mecánicas das madeiras de Castanea sativa Mill. e Acacia melanoxylon R. Br. de procedencia galega co propósito de determinar se son aptas para usos en destilería. Unha vez completado o estudo, as conclusións ás que chega esta enxeñeira constatan que as dúas especies forestais presentan calidades apropiadas para o seu destino nesta industria e concretamente, no caso do castiñeiro.

Na actualidade, Francia e Estados Unidos lideran a exportación de madeira para a fabricación de toneis, mentres que o volume de madeira que achega España a este tipo de industria apenas representa o 11%. Non obstante, os resultados recollidos na tese titulada Optimización do tonel como elemento chave no avellentamento de viños e idoneidade de madeiras de frondosas de procedencia galega para este uso revela a existencia dun importante nicho de mercado para a madeira galega de frondosas.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un estudo senta as bases para clonar os castiñeiros máis resistentes e produtivos

O traballo, elaborado por Ricardo Castro da Universidade de Santiago, céntrase nos mecanismos reguladores da rexeneración de raíces adventicias

A investigadora Cristina Candal presenta un traballo pioneiro sobre mala praxe científica

A tese inclúe a descrición das "paper mills", é dicir, organizacións ilegais que fabrican artigos para a súa venda

A USC investiga novos produtos naturais para loitar contra a avespiña do castiñeiro

Un equipo de Lugo traballa no proxecto 'Go Delicias' co obxectivo de identificar e desenvolver as defensas da árbore fronte ao insecto

A tese da investigadora do CIQUS Soraya Learte, unha das mellores do mundo

A científica da USC foi a única española premiada nos galardóns da Unión Internacional de Química Pura e Aplicada e de Solvay