O Museo de Historia Natural Luís Iglesias da USC, situado no parque de Vista Alegre de Santiago, abriu este xoves 21 a exposición ‘Vespa velutina: unha invasión imparable’, co obxectivo de explicar os danos e ameazas que esta especie supón para a biodiversidade, saúde e seguridade cidadá. A exposición é de balde, en horario de apertura do museo. (de martes a sábado: 11.00-14.00 e 16.30-20.30; e domingos e festivos: 11.00-14.00).
A exposición presenta os resultados de diferentes liñas de investigación sobre diversos métodos de control, como son a loita biolóxica, os biocidas e o emprego de trampas eléctricas. Este control é selectivo e efectivo, xa que busca preservar ao máximo a biodiversidade.
O deseño da mostra inclúe dioramas, paneis, contidos audiovisuais e exemplares dos diferentes tipos de niños e vespas, que axudan a recoñecer esta especie e comprender a súa bioloxía e comportamento. Para a realización da exposición, o Museo contou ca colaboración da Asociación Galega de Apicultura (AGA), do CIFP Politécnico de Santiago e de diferentes grupos de investigación das universidades galegas.
O acto de inauguración estivo presidido polo reitor da USC, Antonio López, que destacou o labor que realiza o Museo para “contribuír á divulgación do coñecemento científico en todos os niveis educativos e a toda a poboación”, ao que engadiu que “é importante conectar universidade, investigación e sociedade para engadir valor á sociedade e atopar solucións aos problemas actuais”.
Na inauguración tamen falou o director do Museo de Historia Natural, Marcos González, que destacou os diferentes bloques temáticos cos que conta a exposición. “Aborda o carácter invasor e procedencia da vespa velutina, a bioloxía e ciclo biolóxico da especie, os danos e ameazas que produce e os medios de loita”, indica.
A vespa velutina é unha especie exótica invasora que representa unha ameaza para a diversidade galega dende a súa chegada hai oito anos. Dende entón, comezou a expansión polo territorio e hoxe está presente en máis de 250 concellos galegos. Esta exposición pretende dar a coñecer a súa repercusión ambiental, así como o impacto socioeconómico, por exemplo, no eido da apicultura.
