Cíes Patrimonio, o proxecto co que o arquipélago aspira a entrar na lista do Patrimonio da Humanidade da Unesco, presentou esta semana unha páxina web na que se recolle a documentación da candidatura e os traballos científicos realizados desde o comezo da iniciativa, hai xa catro anos.
Entre os contidos, destaca unha extensa bibliografía científica, con máis de 300 publicacións nacionais e internacionais, recollida polos trinta membros do comité de investigadores que asesoran a candidatura en eidos como a historia, a flora e a fauna terrestre e mariña, a xeoloxía, a economía ou a paisaxe. Tamén se pode ver este vídeo, no que diversos expertos poñen de manifesto a riqueza do arquipélago.
Por outra banda, a páxina inclúe todas as actividades que se están desenvolvendo ao redor da candidatura, máis de cen ata agora, ademáis dos traballos de investigación que o concello está a financiar, como accións educativas e de voluntariado. Ademais, hai unha axenda na que os interesados poderán descubrir os eventos que se celebrarán proximamente. “Somos pioneiros na cooperación coa universidade; o único concello de España que colabora coa investigación desta maneira”, dixo Caballero.
Actividades da candidatura
O portal de Cíes Patrimonio persegue tamén a interacción cos cidadáns que queiran respaldar a candidatura, coa sección “Únete”, na que calquera persoa pode asinar para apoiar o proxecto e facerse voluntario nas numerosas actividades programadas nos vindeiros meses. Neste senso, a axenda da web recollerá todas estas iniciativas.
A páxina foi presentada polo alcalde de Vigo, Abel Caballero, e a coordinadora do comité técnico da candidatura, Yolanda Aguiar. O rexedor sinalou que o lanzamento do portal, “é un paso moi importante no camiño de Cíes para converterse en Patrimonio da Humanidade da Unesco”.
Podes visitar o portal de Cíes Patrimonio nesta ligazón.
