Os expertos piden grandes cambios na industria e no consumo enerxético.

Os expertos piden grandes cambios na industria e no consumo enerxético.

Os científicos reclaman medidas drásticas para salvar o planeta

91 expertos de 40 países reunidos pola ONU piden cambiar a sociedade para parar un desastre climático

A poucos meses da celebración do Cume do Clima de Nacións Unidas, que este ano será en Katowice (Polonia), 91 expertos de 40 países do Panel Intergobernamental para o Cambio Climático presentaron un informe especial para limitar o quecemento global a 1,5 º C en lugar de 2 º C.

Segundo os autores, xa estamos a sufrir as consecuencias dun aumento do 1 º C respecto dos niveis preindustriais. O aumento das temperaturas parece imparable, pero os efectos do cambio climático se reducirían e mesmo se evitarían se puidésemos limitar o incremento a 1,5 º C en lugar de 2 º C, como consta no Acordo de París aprobado en decembro de 2015 por máis de 195 países.

Un informe especial presentado hoxe en Corea do Sur por 91 expertos de 40 países do Panel Intergobernamental para o Cambio Climático ( IPCC, polas súas siglas en inglés) revela que cun incremento do 1,5º C o aumento do nivel global do mar sería 10 cm inferior que cun 2 º C.

Ademais, a probabilidade de que o océano Ártico quedase libre de xeo no verán sería dunha vez por século cun quecemento global de 1,5 ° C, fronte a un mínimo dunha vez por decenio cun de 2 ° C.

Os expertos din que hai que acelerar algunhas medidas que xa están en marcha

Os arrecifes de coral diminuirían entre un 70% e un 90% cun quecemento global de 1,5 ° C, mentres que practicamente todos eles –máis do 99%– desaparecerían cun de 2 ° C. “Unha das mensaxes fundamentais que trasmite de xeito contundente o informe é que xa estamos a vivir as consecuencias dun quecemento global de 1 ° C, con condicións meteorolóxicas máis extremas, niveis crecentes do mar e un minguante xeo mariño no Ártico, entre outros cambios”, alerta Panmao Zhai, copresidente do Grupo de traballo I do IPCC.

Para os expertos, a limitación do quecemento global a 1,5 º C en lugar de 2 º C tería beneficios claros para as persoas e os ecosistemas naturais. Pero para iso se necesitarían cambios de gran alcance e sen precedentes en todos os aspectos da sociedade, segundo sosteñen nesta nova avaliación.

“Un quecemento de 1,5 ° C ou máis incrementa o risco asociado a cambios duradeiros ou irreversibles, como a perda dalgúns ecosistemas”, declara Hans- Otto Pörtner, copresidente do Grupo de traballo II do IPCC, para quen a limitación do quecemento global tamén daría máis marxe ás persoas e os ecosistemas para se adaptar e permanecer por baixo duns limiares de risco.

Este último informe especial do IPCC –que se solicitou coa aprobación do Acordo de París en 2015– será unha contribución científica fundamental para a Conferencia sobre o Cambio Climático ( COP24) que se celebrará do luns 3 ao 14 de decembro na cidade polaca de Katowice para examinar o Acordo de París. “Con máis de 6.000 referencias citadas e a contribución abnegada de miles de examinadores expertos e gobernamentais de todo o mundo, este importante informe dá testemuño da amplitude e a pertinencia normativa do IPCC”, explica Hoesung Le, presidente do IPCC.

A boa noticia é que algúns tipos de medidas que se necesitarían para limitar o quecemento global a 1,5 ° C xa se están levando a cabo en todo o mundo, pero sería necesario aceleralas”, afirma Valerie Masson- Delmotte, copresidenta do Grupo de traballo I.

Segundo o informe, serían necesarias transicións “rápidas e de gran alcance” na terra, a enerxía, a industria, os edificios, o transporte e as cidades. Para os expertos, sería imprescindible que as emisións netas globais de CO2 de orixe antropoxénico diminuísen en 2030 en preto dun 45% respecto dos niveis de 2010. Ademais, deberían seguir diminuíndo ata alcanzar o “cero neto” en 2050.

“Limitar o quecemento a 1,5 ° C é posible segundo as leis da química e a física, pero para iso se necesitarían cambios sen precedentes”, asevera Jim Skea, copresidente do Grupo de traballo III do IPCC. Se deixamos que a temperatura global supere o 1,5 ° C sería necesario depender en maior medida de técnicas –que levarían riscos para o desenvolvemento sustentable– que absorban CO2 da atmosfera para volver a un quecemento global inferior a 1,5 ° C en 2100.

“As decisións que tomemos hoxe son decisivas para garantir un mundo seguro e sustentable para todos, tanto agora como no futuro”, di Debra Roberts, copresidenta do Grupo de traballo II do IPCC, para quen este informe proporciona aos responsables das políticas e os profesionais a información que necesitan para adoptar decisións dirixidas a afrontar o cambio climático. “Os próximos anos son probablemente os máis importantes da nosa historia”, conclúe Roberts.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.