Chega o espectáculo da choiva de estrelas. Dende o 16 ata o 25 de abril poderemos gozar deste fenómeno: as Líridas. Os ceos despexados previstos en Galicia para a fin de semana favorecerán a vision e na noite do luns 22 chegará o máximo de actividade, cuns 20 meteoros/hora, aínda que en ocasións anteriores sorprendeu con máximos de máis de 100.
O mellor momento para observar este espectáculo será cando se levante sobre o horizonte o punto do que parecen proceder os meteoros vistos desde a nosa perspectiva. A este punto denomínaselle ‘radiante’ e está situado na constelación de Lira, de aí o nome da choiva.
Para localizar o radiante, abonda con atopar a estrela Vega, a segunda máis brillante do hemisferio Norte. Aínda que o radiante é o punto do que parecen radiar, non se recomenda mirar cara el xa que hai maiores posibilidades de gozar da choiva se miramos ao seu redor.
As líridas prodúcense cando as milimétricas partículas de po que deixa ao seu paso o cometa Thatcher ( C/1861 G1) son atraídas pola gravidade terrestre e entran en contacto coa nosa atmosfera á incrible velocidade de 175.000 km/ h (49 km/s).
Os meteoroides, que así se chaman estas partículas, quéntanse de tal forma que entran en ignición, pulverizándose e producindo o fenómeno lumínico chamado meteoro. Se algún fragmento de meteoroide logra impactar contra o noso planeta, estariamos a falar entón de meteorito. Como o tubo de residuos, ou tubo meteórico, está fixo no sistema solar e a Terra vira arredor do Sol cun período constante, sempre o atravesamos nas mesmas datas, de aí a periodicidade anual de todas as choivas de meteoros.
Para gozar do espectáculo é necesario contar coa maior amplitude de campo posible, por tanto, o mellor xeito de disfrutar do espectáculo é facelo a simple vista observando aredor do radiante. Ademais, e como en todas as observacións astronómicas, aconsellamos afastarse da cidade para observar o maior número de meteoros.
