Ramón Núñez. Foto: Axencia Sinc.
Ramón Núñez. Foto: Axencia Sinc.

A UDC concede a Distinción de Honra a Ramón Núñez, ‘pai’ dos Museos Científicos

Recibe o galardón polas súas achegas á divulgación e pola aposta polo "espírito lúdico e a provocación intelectual como ferramentas educativas"

Ramón Núñez Centella (A Coruña, 1946), principal impulsor e artífice da rede de Museos Científicos da cidade, recibirá este venres a Distinción de Honra que lle outorgará a Facultade de Ciencias da Universidade da Coruña, en recoñecemento aos seus méritos “na divulgación científica na escena europea, defensor da interdisciplinariedade cultural, a diverxencia, o espírito lúdico e a provocación intelectual como ferramentas educativas”. O acto de homenaxe terá lugar no salón de actos da Facultade ás 12.00 horas.

Ramón Núñez está considerado o meirande impulsor da museoloxía científica en España, contribuíndo á educación en Ciencia e á divulgación da Ciencia en practicamente todos os formatos: artigos en prensa, conferencias, colaboracións en radio e TV, exposicións “clásicas” e disruptivas, etc. Desenvolveu practicamente todo o seu labor desde a cidade da Coruña, contribuíndo á formación científica de moitas xeracións. Un dos seus principais legados é o “Prohibido non tocar”, lema co que os museos herculinos animan á interactividade e experimentación nas súas exposicións.

Traxectoria de Ramón Núñez

O divulgador licenciouse en Ciencias pola USC e é Master of Arts en Didáctica das ciencias pola Universidade de Nova York. Dedicouse ao ensino das Ciencias en ensino primario e secundario entre 1970 e 1983. Adaptou para España o programa “Science Curriculum Improvement Study” (SCIS), da Universidade de California – Berkeley, para o ensino activo da ciencia a nivel elemental. Entre 1976 e 1977 formou parte do equipo do Project City Science (Universidade de Nova York, Prof. Dr. F. James Rutherford).

En 1981 e 1982 organizou a “Mostra Bibliográfica para Escola Galega”, catálogo de libros sobre Galicia dirixido a ensinantes e estudantes. En 1983 o Concello da Coruña nomeouno director do Servizo Municipal de Educación, e desde aquí propuxo a creación da Casa das Ciencias, inaugurada en 1985, que dirixiu desde a súa apertura. Posteriormente impulsou a a Domus (Casa do Home), inaugurada en 1995, e o Aquarium Finisterrae (Casa dos Peixes), que abriu en 1999. Tamén contribuíu ao nacemento da sede do Museo Nacional de Ciencia y Tecnología (Muncyt) da Coruña, que dirixiu desde 2008 ata a súa xubilación en 2013.

Alén da rede de museos da Coruña, Ramón Núñez tamén participou no deseño museolóxico de importantes centros divulgativos, museos de ciencia e planetarios en España, como o Museo das Ciencias Príncipe Felipe de Valencia, Parque das Ciencias de Granada, Planetario de Pamplona, ou Museo da Evolución Humana de Burgos.

Do mesmo xeito, estableceu importantes iniciativas para a renovación do ensino das ciencias e a promoción da divulgación científica, como o Premio Luís Freire de investigación científica ou os Premios Prismas de Divulgación Científica, que figuran xa entre os máis prestixiosos de España. Foi colaborador habitual da revista Muy Interesante dende 1991, e publicou artigos de opinión e de divulgación científica en xornais coma El País, La Vanguardia, Diario 16 e La Voz de Galicia, onde foi un dos creadores do suplemento “La Voz de la Escuela”.

En 1992 recibiu o Premio Nacional de Periodismo Científico, outorgado polo CSIC. En 2009 recibiu o Premio José María Savirón 2009 á divulgación científica. É membro da Asociación Española de Periodismo Científico, da Academia de Ciencias de Nova York e da Royal Institution. Pronunciou centos de conferencias en todo o mundo sobre museoloxía, divulgación, didáctica das ciencias, periodismo científico e historia da ciencia.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.