A Domus da Coruña celebrará, co gallo do Día da Muller e a Nena na Ciencia, un amplo programa de actividades dirixidos a todos os públicos que se estenderá desde o propio martes 11 ata o sábado 15.
A celebración comezará o día 11 co ciclo de charlas de cultura científica “Estrelecidas”, coordinado pola escritora e divulgadora Estíbaliz Espinosa. Dentro do ciclo, que se celebrará na Domus ás 20.30 horas, participarán as seguintes conferenciantes:
– Martes 11: Lunáticas ou a muller na Lúa segundo a ciencia, o cinema e a literatura. Con Laura Morrón, física e editora, e Borja Tosar, astrofísico e piloto.
– Xoves 13: Descerebradas ou cerebros, anatomías e sexos segundo a ciencia e a literatura. Con Casto Rivadulla, profesor da UDC e investigador en NEUROcom; Marilar Aleixandre, escritora e bióloga; e Joana Magalhaes, bióloga e divulgadora científica.
– Venres 14: Lingoreteiras ou escribir e publicar ciencia. Con Deborah García Bello, química e divulgadora científica, e José Edelstein, físico e escritor.
Ademais destas charlas, o mércores 12 de febreiro, ás 11 horas, haberá un taller sobre o ADN, organizado pola Asociación Española contra o Cancro, ao que asistirá un grupo escolar de Primaria, do CEIP Eusebio da Guarda da Coruña. A actividade consistirá na extracción de ADN dunha froita, e na realización dun xogo de cartas no que se emparellarán científicas importantes na historia cos seus fitos máis relevantes.
Tamén o mércores 12, ás 19.30 horas, terá lugar a charla titulada “Cáncer de pulmón: ejemplo de éxito de oncología de precisión” a cargo da Dra. Rosario García Campelo, oncóloga no Complexo Hospitalario Universitario da Coruña. Organizada por CorBi Foundation.
E o sábado 15, ás 12 horas, a Unidade de Divulgación Científica da Universidade da Coruña organiza a actividade Atrévete a investigar con elas!, dirixida a público familiar. Trátase de compartir espazo con catro investigadoras da UDC para coñecer a súa traxectoria científica e vital, os seus logros profesionais e algunhas anécdotas que viviron co obxecto de incentivar entre as persoas asistentes a curiosidade pola profesión de investigadora e científica. Estas son as científicas participantes:
– María Carreiro Otero, investigadora do Grupo de Arquitectura e Urbanismo Sostible (GAUS).
– Carmen de Labra Pinedo, investigadora do grupo Neurociencia e Control Motor (NEUROcom).
– Teresa López, investigadora do grupo Investigación Lingüística e Literaria Galega (ILLA).
– Vanessa Valdiglesias García, investigadora do programa Beatriz Galindo e do grupo Diagnóstico Conductual e Molecular Aplicado á Saúde ( DICOMOSA).
A entrada ás charlas e as actividades do sábado 15 é libre, ata completar a capacidade da sala.
