O Centro Oceanográfico de Vigo recibirá a medalla Castelao, a distinción que concede a Xunta de Galicia, previa proposta de institucións ou entidades galegas, en recoñecemento a unha traxectoria destacada a prol do país. Pertencente ao Instituto Español de Oceanografía (IEO), o Oceanográfico de Vigo foi fundado hai un século, no que se consolidou como unha referencia internacional no estudo dos mares. Recentemente, tamén recibiu a Medalla da cidade de Vigo. A distinción será entregada, como cada ano, o vindeiro 28 de xuño, data que coincide co regreso dos restos mortais de Castelao a Galicia en 1984.
Fisicamente, a Medalla Castelao mide 50 mm no seu eixo maior e 36 no menor. Reproduce no anverso a cruz deseñada por Castelao para As cruces de pedra na Galiza, sobre fondo azul, e a lenda “Deus fratresque Gallaeciae“; e no reverso o nome da persoa distinguida e a data de concesión. A medalla vai pendurada cun cordón trenzado en branco e azul.
A Xunta destaca o seu traballo de formación de investigadores sobre medio mariño
A Xunta destacou que o Centro Oceanográfico de Vigo “leva a cabo un importante traballo de formación de investigadores e técnicos sobre o medio mariño, polo que é moi habitual que estudantes de FP realicen prácticas na institución. Tamén é habitual ver traballando alí a profesionais doutras institucións nacionais e internacionais”.
Ademais, salientou que “desenvolve a súa actividade investigadora no ámbito dos recursos mariños, dos problemas relacionados coa oceanografía e a contaminación do medio mariño. Na actualidade o Centro Oceanográfico de Vigo é o máis grande dos nove centros do Instituto Español de Oceanografía cun equipo de 119 persoas e forma parte do Campus de Excelencia Internacional Campus do Mar“.
Os outros galardoados este ano coa Medalla Castelao son o presentador de televisión Xosé Ramón Gayoso, o Grupo Nove -que reúne a cociñeiros destacados do país-, a gaiteira Cristina Pato, e o intelectual Justo Beramendi.
