O caracol 'Littorina fabalis' destaca pola diversidade da súa cor. Imaxe: Duvi.
O caracol 'Littorina fabalis' destaca pola diversidade da súa cor. Imaxe: Duvi.

Por que ten distintas cores este caracol mariño?

O caracol mariño Littorina fabalis é un molusco gasterópodo que está presente en numerosos intermareais rochosos de gran parte do litoral galego e que se caracteriza, entre outros moitos aspectos, polo polimorfismo da cor das súas cunchas. Consciente deste feito e disposto a estudar as súas causas o investigador Daniel Estévez centrou a súa tese de doutoramento no estudo dos diferentes aspectos relacionados co feito de que este polimorfismo cromático se teña mantido estable ao longo das últimas décadas.

Daniel Estévez. Foto: Duvi.
Daniel Estévez. Foto: Duvi.

Foron tres anos de investigación e estudo nos que tratou de dar resposta a múltiples preguntas, entre elas a si existe un mecanismo de selección dependente das frecuencias nas poboacións galegas desta especie, de que forma funciona, cal é o compoñente de eficacia máis relacionado coa cor da concha e se a deriva xenética pode explicar os cambios en frecuencia nos distintos caracteres.

L. fabalis amosa un claro polimorfismo de cor e patrón de bandeado na concha que, na aldea coruñesa de Abelleira, en plena ría de Muros e Noia, leva manténdose estable durante máis de 21 anos”, explica o autor da tese, investigador no Departamento de Bioquímica, Xenética e Inmunoloxía, quen fai fincapé en que despois de todo o traballo realizado ao longo dos tres anos que lle dedicou á redacción deste estudo, ten claro que un dos mecanismos máis plausibles para explicar o mantemento da cor no tempo é unha selección sexual dependente das frecuencias que está causada por unha preferencia negativa exercida polos machos deste caracol.

Unha das explicacións máis plausibles é unha selección sexual depdendente das frecuencias das diversas cores

Esta explicación ten, segundo defende o investigador, a súa principal defensa no feito de que as parellas máis frecuentes son aquelas entre cores distintas, o que tamén sería consecuencia dunha preferencia negativa. Por outra parte, para o patrón de bandas non se atoparon evidencias de selección sexual dependente das frecuencias, pero si que acharon unha relación inversa entre unha compoñente de eficacia global e a frecuencia de individuos bandeados na poboación.

“É de interese o feito de que, en ambos carácteres a deriva xenética -forza evolutiva que explicaría os cambios en frecuencia polo azar- explicaría suficientemente os cambios no polimorfismo cando estes non son esaxerados de ano a ano mentres que non os explica cando son máis acusados”, recalca Estévez, quen considera que isto apuntaría a que tanto a cor como o patrón de bandeado mantéñense no tempo pola acción conxunta tanto da deriva como da selección natural, alternándose a intensidade destas dúas en función da magnitude dos cambios no polimorfismo.

Os resultados desta tese de doutoramento, dirixida polos profesores Juan Galindo e Emilio Rolán e defendida na Facultade de Bioloxía, permiten agora que a comunidade científica poida aproximarse a predicir a evolución biolóxica en diferentes poboacións naturais desta especie de caracol. “Coñecer de que formas varía a diversidade xenética permite avaliar como soportarían ditas poboacións cambios e perturbacións ambientais”, explica o investigador, ao tempo que subliña o feito de que no momento de establecérense plans de conservación ou de explotación dun determinado recurso é sempre fundamental coñecer estes aspectos nos distintos organismos dun ecosistema determinado.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.