O mesmo día no que o pelotón da Vuelta a España 2018 chegará ás rúas de Madrid, na última etapa da carreira, outra Vuelta comezará nas rúas de Vigo. Será tamén sobre a bicicleta, pero traerá consigo, a maiores, unha reivindicación necesaria. É a Vuelta a España pola Ciencia, unha iniciativa de cinco científicos apaixonados polo deporte, dous deles da Universidade de Vigo (Luís Navarro e José María Sánchez), que botou a andar este ano para divulgar o traballo dos científicos españois e, en palabras dos seus impulsores, para “remexer conciencias sobre as dificultades para investigar en España”.
O grupo Divulgare da UVigo, que dirixe o propio Navarro, preparou un vídeo promocional para a carreira.
Desde o día 17 e ata o 21, o pelotón científico – que completan Pablo Vargas, Adrián Escudero y Fernando Valladares – visitará as universidades de Vigo, Santiago de Compostela, Oviedo, León, Salamanca e Madrid (Universidad Rey Juan Carlos). O día 16, a UVigo acollerá ademais a presentación da iniciativa ás 18 horas.
Programa da Vuelta
En cada etapa, os científicos farán parte do traxecto, uns 120 quilómetros, en bicicleta, e entrarán nas cidades de chegada con outros científicos e simpatizantes para facer visible a súa reivindicación. Na ruta, o pelotón aproveitará tamén para elaborar pílulas divulgativas sobre a relevancia científica dos lugares que van percorrendo (paisaxe, flora, fauna, o impacto humano, etc.).
Cada etapa rematará nas cidades de chegada cun acto divulgativo aberto ao público
Ademais, nas universidades de cada unha das cidades celebraranse actos académicos abertos ao público. Os científicos participantes na Vuelta ofrecerán charlas sobre a situación da ciencia en España e sobre temas de actualidade no eido da bioloxía, como o cambio climático, as interaccións biolóxicas, as especies invasoras ou o impacto humano no medio ambiente. Haberá tamén unha rolda de preguntas na que o público poderá facer cuestións aos científicos.
Toda a información sobre a Vuelta Ciclista pola Ciencia na súa web.
