Un recoñecemento ao esforzo e á dedicación. Ese podería ser o resumo do galardón que acaba de recibir o equipo do SpaceLab da Universidade de Vigo (UVigo) polo seu proxecto CAMera based INfraestructure Integrity Tracking from Orbit (Caminito). A Axencia Espacial Europea (ESA) entregoulles o premio Copernicus Masters na categoría de infraestruturas. Os investigadores galardoados definen a súa iniciativa como “unha proposta revolucionaria”, posto que empregarían as imaxes de Copernicus para a xestión e coidado dos sendeiros do Camiño de Santiago. O galardón, que se entregou un acto virtual, está dotado con 10.000 euros e outros 10.000 en imaxes satelitais e datos.
“O seu obxectivo é proporcionar información para a prevención e actuación ante posibles incidencias, así como para o estudo da vexetación e masas de auga para detectar posibles desprendementos”, detalla o director executivo responsable de xestión de proxectos do equipo UVigo SpaceLab, Manuel Diz, que destaca o traballo desenvolvido polos integrantes do equipo que comezaron o seu segundo ano nesta formación e que na actualidade son responsables dos departamentos de software, comunicacións, enxeñaría de sistemas, organización e márketing, electrónica e ADCS.
“O obxectivo do proxecto é proporcionar información para a prevención e actuación ante posibles incidencias”
“Para nós é un recoñecemento ao noso traballo, ademais de que todo este tipo de iniciativas e concursos poñen en valor o papel que ten o espazo, tanto no día a día dun cidadán de a pé, como para as persoas que nos dedicamos desde os nosos estudos a beneficiar e xerar estes coñecementos, solucionando así problemas”, recoñece Diz.
Outros recoñecementos
O premio europeo Copernicus Masters súmase aos galardóns rexionais, organizados tamén pola Axencia Espacial Europea, Galileo e Copernicus Galicia 2021 que o equipo UVigo SpaceLab acadou recentemente polos seus proxectos Adagio e Caminito, respectivamente. No caso do certame europeo, os integrantes do equipo confirman que “xa o seguiamos desde hai un ano, posto que algúns docentes da UVigo xa participaran anteriormente. Ao ver os anteriores resultados, animámonos a participar e buscar propostas que encaixasen nas liñas de traballo marcadas pola Unión Europea para crear e axudar ao desenvolvemento das constelacións de satélites Copernicus e Galileo”, explican os estudantes, que cualifican de “incríble” gañar o certame europeo.
O concurso celébrase desde o ano 2011 por iniciativa da Axencia Espacial Europea, como parte da súa misión de fomentar a captación de usuarios do programa e Observación da Terra Copernicus. Nesta década máis de 3.000 persoas de 70 países participaron no certame, que premia as mellores ideas innovadoras e desenvolvementos que usan datos de observación da Terra para abordar desafíos sociais e empresariais e máis dun cento gañaron ata o de agora o concurso, que outorgou nestes dez anos uns 4,3 millóns de euros.
Meses de traballo ata acadar o recoñecemento europeo
Aínda que os integrantes de UVigo SpaceLab centran desde hai algo máis dun ano a súa actividade no desenvolvemento de BIXO, Bacteriological Intercommunication Experiment in Orbit, unha misión biolóxica que ten por obxectivo analizar os efectos reais da exposición prolongada dos microorganismos ao medio espacial, o pasado verán comezaron a traballar en Caminito e Adagio. “Ao inicio fixemos varias reunións de traballo para desenvolver a idea, pero a medida que avanzabamos nas fases do concurso pedíronnos elaborar máis documentación, realizar presentacións con expertos europeos da ESA, analistas de negocio… E pouco a pouco pasando estas ‘probas’ acadamos o éxito”, detalla Diz.
Centrados no deseño de subsistemas de BIXO
Con máis dunha trintena de estudantes das escolas de enxeñaría Industrial, Telecomunicación, Minas e Enerxía, Informática e Aeronáutica e do Espazo integrados no equipo UVigo SpaceLab deste ano, o alumnado, logo de pasar a primeira fase da misión BIXO, céntrase na actualidade no deseño de diversos subsistemas. Coa estrutura do satélite lista e pechando diversos acordos con patrocinadores respecto dalgúns deses subsistemas de grande importancia para a misión, os integrantes do equipo aseguran estar cada vez máis preto do seu obxectivo: a posta en órbita. “2022 depararanos grandes sorpresas, posto que a inicios do primeiro trimestre deste ano comezaremos outra ampliación do equipo, coa intención que supere as 40 ou 50 persoas, ademais de que esperamos participar en novos concursos, eventos e congresos da ESA para acadar que BIXO estea en órbita”, explica Diz.
Podes ler a noticia do DUVI na seguinte ligazón.
