A Rede Galega de Biomateriais renova o apoio da Xunta ata 2019

Crear materiais avanzados aplicados á práctica clínica, compartindo tres campos de acción prioritarios: os biomateriais, a nanotecnoloxía e o deseño de biosensores, entre outras disciplinas. Estos son algúns dos obxectivos da Rede Galega de Biomateriais, que acaba de renovar o apoio da Xunta de Galicia ao proxecto, a través do Programa de Consolidación de Unidades de Investigación Competitivas do Sistema Universitario de Galicia.

Con este financiamento, a RGB poderá funcionar cando menos ata o ano 2019. A finalidade destas investigadoras e investigadores é, en liñas xerais, desenvolver produtos sanitarios, como próteses, implantes e substitutivos óseos para a rexeneración de tecidos danados; produtos farmacolóxicos, como nanopartículas ou hidroxeles para a liberación de fármacos no organismo e biosensores para a detección temperá de enfermidades.

Publicidade

Múltiples aplicacións dos biomateriais

Precisamente a rexeneración de cartilaxe a partir de biomoléculas mariñas ou os hidroxeles con usos biomédicos, son dous dos temas que este xoves, 30 de novembro, se abordarán na segunda xornada científica do Instituto de Bioenxeñaría en Rede para o Envellecemento Saudable, Iberos, que se celebrará no Museo Nacional de Ciencia e Tecnoloxía (Muncyt) na Coruña. Iberos constituíuse hai uns meses promovido pola propia RGB, coa finalidade de crear na Eurorrexión Galicia-Norte de Portugal un polo de coñecemento especializado sobre a aplicación da bioenxeñaría á mellora da saúde das persoas maiores.

Os integrantes da Rede Galega de Biomateriais pertencen aos grupos de Novos Materiais e de Química Coloidal e TeamNanoTech da Universidade de Vigo, todos eles integrados no Instituto de Investigación Sanitaria Galicia Sur (IISGS), así como aos grupos I+D Farma, o de Cirurxía, Radioloxía e Ecografía Experimental Veterinaria e o de Cirurxía da Universidade de Santiago de Compostela, este último vinculado ao Instituto de Investigación Sanitaria IDIS-CHUS.

Publicidade

En tres anos o grupo realizou máis de 200 publicacións científicas

Nos tres anos de actividade da rede, os seus membros foron quen de concentrar máis de 10 millóns de euros en ingresos, sumar máis de 200 publicacións científicas, 29 proxectos de investigación (sete deles internacionais), 50 contratos de I+D con empresas e institucións de dúas patentes en explotación.

A posta en marcha de dúas spin-off é outra das consecucións da RGB, que, por unha banda lanzou Biofast, spin-off do Grupo de Novos Materiais da Universidade de Vigo, centrada na revalorización de subprodutos pesqueiros, principalmente dente de tiburón, a través dun produto sanitario capaz de rexenerar e reparar o tecido óseo. Xunto a Biofast, que se atopa en proceso de constitución como empresa, a rede lanzou HGBeyond Materials Science. Nacida do Grupo I+D Farma da Universidade de Santiago, baixo o nome de Lentimed, esta spin-off desenvolve hidroxeles para a liberación de substancias activas no organismo.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un investigador da UVigo axuda a resolver un dos enigmas dos ciclos das idades de xeo

O achado, que emprega unha técnica analítica que permite datar rexistros paleoclimáticos ata hai 600.000 anos, axudará a prognosticar con maior precisión o clima futuro

Este cranio de quen é? Como identificar restos humanos con imaxes de antes e despois da morte

Un investigador do CITIC desenvolve un sistema que axudará a mellorar a metodoloxía da superposición craniofacial

Todo caduca: o investigador que recrea obras de arte para estudar como envellecen

Un experto en ciencia de materiais colabora co CGAC para avaliar a calidade e durabilidade dos materiais que se empregan no patrimonio artístico do centro galego

Unha tese da USC propón o uso de bagazo de Albariño para o penso e microalgas para facer filloas

O investigador Aly Jesús Castillo estuda o emprego de novos alimentos ou materias primas para dar resposta ás actuais demandas do sector agroalimentario