Pedro Duque, enxeñeiro aeronáutico e primeiro astronauta de nacionalidade española que viaxou ao espazo, será o próximo ministro de Ciencia do Goberno español. Así o avanzou La Sexta a primeira hora da mañá. Queda por determinar a denominación exacta e as competencias que terá o novo ministro, aínda que as primeiras informacións apuntan a que será a carteira de Ciencia, Innovación e Universidades.
Duque visitou Galicia en abril para participar na feira STEM Lab, un encontro educativo con rapaces e profesores
Hai menos de dous meses, Pedro Duque visitou Santiago para participar na feira STEM Lab Galicia, un encontro educativo no que se expoñían os proxectos de centros de ensino galego no eido da ciencia, a tecnoloxía, a enxeñaría e as matemáticas.
A primeira reacción pública de Duque ao seu nomeamento foi na súa conta de Twitter, cun texto na que lembraba a súa nai xunto a unha tira de Forges:
Ojalá estuviera mi madre. Siempre @forges pic.twitter.com/7QnpP60dmo
— Pedro Duque (@astro_duque) 6 de junio de 2018
O novo ministro de Ciencia, nacido o 14 de marzo de 1963, é enxeñeiro aeronáutico pola Universidade Politécnica de Madrid (Escola Técnica Superior de Enxeñeiros Aeronáuticos) e académico correspondente da Real Academia de Enxeñaría de España desde abril de 1999. En maio de 1992 foi seleccionado para formar parte do Corpo de Astronautas da Axencia Espacial Europea, con base no Centro Europeo de Astronautas en Colonia (Alemaña). Tras prepararse na Cidade das Estrelas de Moscú e en Estados Unidos, Duque converteuse no primeiro astronauta de nacionalidade española en viaxar ao espazo en 1998, e regresou en 2003.
Tras uns anos en excedencia, Duqueregresou á ESA en 2011, onde retomou o seu posto de astronauta e mantén as cualificacións para un posible novo voo espacial. Actualmente é responsable do control e revisión de proxectos futuros.
Alén da súa carreira profesional, recibiu múltiples recoñecementos tanto en España como no exterior. En marzo de 1995 recibiu a Orde da Amizade de Rusia; en febreiro de 1999 o Rei de España impúxolle a Gran Cruz ao Mérito Aeronáutico; e en outubro dese mesmo ano outorgóuselle o Premio Príncipe de Asturias á Cooperación Internacional, xunto cos astronautas Chiaki Mukai, John Glenn e Valery Polyakov.