O Concello de Vigo, a través do proxecto da candidatura das Illas Cíes ao Patrimonio da Humanidade da Unesco, propón para este xoves 4 e venres 5 de outubro unha serie de obradoiros científicos na Porta do Sol de Vigo. Baixo o título “Cíes, Patrimonio da Ciencia“, a actividade ten por obxectivo achegar á cidadanía, e en particular aos máis cativos, o valor científico e natural do arquipélago.
Pola mañá, alumnos de varios centros escolares vigueses acudirán ao lugar para coñecer de preto, a través de experimentos reais, diversos aspectos da flora, a fauna e a xeoloxía das Cíes. Cada un deles estará coordinado por expertos na materia, que resolverán aos estudantes as dúbidas que xurdan.
Pola tarde, en horario de 17 a 20 horas, os obradoiros estarán abertos ao público xeral, que poderá achegarse á Porta do Sol para descubrir todo o patrimonio científico que ofrecen as Illas Cíes. A organización dos talleres corre a cargo de GCiencia.
