Mar Sobral, investigadora distinguida do grupo EcoPast da USC, acaba de ser nomeada editora xefe asociada da publicación Ecological Monographs, pertencente á Asociación Americana de Ecoloxía. As liñas de investigación de Sobral céntranse nas relacións entre a selección natural e a plasticidade dos organismos profundando na comprensión das dinámicas evolutivas, así como na relación entre os organismos e o ciclo do carbono mellorando o entendemento dos vínculos entre a vida e os ciclos bioxeoquímicos.
A investigadora desenvolveu estadías posdoutorais na Universidade de Stanford e no Centro de Ecoloxía Funcional e Evolutiva de Francia. Conferenciante en múltiples congresos internacionais, publica periodicamente artigos de divulgación e imparte charlas sobre a emerxencia climática e sobre igualdade na ciencia. É copresidenta da Comisión de Igualdade da Asociación Española de Ecoloxía Terrestre (AEET) e dedica gran parte da súa actividade á loita contra a discriminación de xénero no mundo académico.
Ecological Monographs publica traballos tanto en ciencias fundamentais como aplicadas alén de crear unha comunidade científica máis igualitaria, diversa e inclusiva, e atopar solucións aos desafíos que enfrontan as minorías. Sobral cualificou o nomeamento de “grande honra, privilexio e enorme desafío”.
