Únete á nosa canle de Whatsapp
Un retrato da Galicia de hai un século trazado en tres dimensións, grazas á fotografía estereoscópica. É o legado dun misterioso fotógrafo do que só coñecemos as sigras do seu nome, H. B., e que dende 1913 a 1922 realizou viaxes por diversas cidades, retratando as súas estampas máis características por duplicado. O Arquivo H. B. constitúeno máis de 870 placas estereoscópicas que foron adquiridas polo Estado no 2013 e que agora se fan públicas polo Ministerio de Cultura dentro dos fondos dixitais abertos da súa Fototeca.
A estereoscopia foi unha técnica moi de moda na fotografía do século XIX, que permitía ver unha imaxe tridimensional ou crear a ilusión de profundidade ao unir dúas fotos nun só visor. O cerebro fundía ambas fotografías como acontece de xeito habitual cando os humanos vemos a realidade.
A técnica empregada por H. B. consistía en situar dúas cámaras iguais, unha xunto á outra, quitando a tapa dos dous obxectivos ao mesmo tempo. Estas cámaras binoculares ou estereoscópicas reproduían dúas imaxes nunha única placa de cristal. No caso deste autor afeccionado, conservou as súas fotos en xelatina sobre vidro, en negativos de 10,5×4,5 cm.
O singular Arquivo H. B. inclúe imaxes de cidades españolas e europeas que percorreu, con vistas de lugares, monumentos, balnearios, festas e outras actividades, así como eventos da época.
No caso de Galicia, o fotógrafo tomou fotografías estereoscópicas de tres cidades: A Coruña, Ferrol e Santiago de Compostela. Trátase de 76 imaxes dobres, que recollen lugares emblemáticos como a praia de Riazor, a catedral de Santiago, a rúa do Vilar, o hostal dos Reis Católicos ou o mosteiro de San Martiño Pinario.
Tamén aparecen estampas costumistas, como as das peixeiras que traballan con polbos na praia da Coruña, ou unha feira nesta mesma cidade. Tamén chaman a atención as imaxes tomadas nos arredores de Compostela ou os detalles do buque Alfonso XIII nos días seguintes á súa botadura en Ferrol.
Aquí podes ver unha galería das fotos estereoscópicas de Galicia do Arquivo H.G. que conserva a Fototeca do Ministerio de Cultura:
