A última portada da revista National Geographic, correspondente ao número de xuño en Estados Unidos, é das que se recordan durante moito tempo. Co sinxelo titular Planet or plastic (Planeta ou plástico?), a publicación amosa unha creación do artista mexicano Jorge Gamboa que fusiona un iceberg cunha bolsa de plástico.
Gamboa xa presentara a imaxe á Bienal do Póster de Bolivia en 2017, onde obtivo o primeiro premio na categoría de Política e sociedade. “Oito millóns de toneladas de plástico acaban no océano cada ano. E iso é só a punta do iceberg”, pódese ler no subtítulo. A portada tivo unha gran acollida, especialmente en redes sociais.