Co gallo do Día da Terra deste ano, o pasado 22 de abril, a NASA lanzou á xente de todo o mundo unha simple pregunta: en que lugar da Terra estás agora mesmo? A idea era conseguir que miles de persoas enviasen unha autofoto coas súas respostas para construír un selfie global: retratar a Terra cun mosaico composto por todas as fotos cedidas por cidadáns de todos os continentes. A NASA recibiu más de 50.000 imaxes, das que se desbotaron aquelas que ou non eran accesibles ou non se consideraron utilizables. Hoxe, a axencia aeroespacial de Estados Unidos lanzou a composición, construída con 36.422 fotos individuais, de 113 países, publicadas previamente polos cidadáns en distintos medios sociais en liña coa etiqueta #globalselfie: Twitter, Instagram, Facebook, Google+ e Flickr. O resultado: unha impresionante imaxe de 3,2 gigapíxeles coa que se pode interactuar e facer zoom para ver en detalle cada unha das fotografías que compoñen este mosaico e as mensaxes de cada cidadán. O obxectivo do proxecto foi contribuír a concienciar a toda a poboación mundial sobre a beleza e a fraxilidade do planeta Terra. O mosaico pode verse a pantalla completa clicando na opción das frechas.
GCiencia realiza unha reserva expresa das reproducións e usos das obras e outras prestacións accesibles desde este sitio web a medios de lectura mecánica ou outros medios que resulten adecuados a tal fin de conformidade co artigo 67.3 da Real Decreto - lei 24/2021, do 2 de novembro // Auditado por GFK
