O pasado 6 de decembro, a sonda InSight da NASA estaba a tomar o seu primeiro ‘selfie’ no planeta Marte. Usando unha das cámaras do seu brazo robótico, captou unha serie de 11 imaxes que, unha vez superpostas, serviron para crear o mosaico coa imaxe completa da nave.
É o mesmo proceso que adoita utilizar o rover Curiosity para retratarse no planeta vermello. No selfie de InSight pódense observar os seus paneis solares e toda a cuberta deste módulo de aterraxe, incluíndo os seus instrumentos científicos, a antena UHF e os dous sensores meteorolóxicos TWINS (pezas brancas situadas aos lados) de fabricación española.