A Área de Normalización Lingüística da UVigo ten novo calendario para 2018. Despois do éxito das tiras cómicas do debuxante Luis Davila, que acadaron cifras históricas de impacto en redes sociais, o artista pontevedrés Kiko da Silva será o encargado de ilustrar o ano que acaba de comezar. 12 debuxos para, de novo, loitar contra os prexuízos cara o galego botando man do humor gráfico.
Mantendo o lema Na Universidade en galego. Sen prexuízos, a ANL volve apostar polo formato dun calendario de parede no que cada páxina é un mes de 2018 e, en cada unha delas, o ilustrador gráfico Kiko Da Silva introduce unha viñeta na que a través do humor e a retranca presenta diferentes situacións cargadas de prexuízos sobre a lingua e se achegan recursos e estima para superalos. “Trátase de empregar a gracia, o humor e a retranca para chegar á xente e darlle armas coas que loitar contra ese tipo de situacións que xa deberían estar superadas”, explica Paulo Cabral, director da ANL, quen se amosou tremendamente satisfeito polo éxito que tivo o calendario de 2017.
Nesta ocasión, foron editados 500 exemplares máis ca en 2017, facendo un total de 2000, que serán enviados ás secretarías e decanatos das distintas escolas, facultades e departamentos. A maiores, todas as persoas que estean interesadas poden descargalo en formato pdf na web da ANL.
É “un reto que impón, pero que tamén ilusiona”. Así acolleu Kiko da Silva o encargo da Universidade para facerse cargo do calendario de 2018. “Desde o principio tiven claro que o mellor era empregar unha das fórmulas que ten o noso idioma para comunicar, a retranca”, explica o autor das viñetas de 2018, ao tempo que fai fincapé na importancia de “empregar o humor non só como fin de facer rir, senón de facer pensar e cavilar sobre a sociedade na que vivimos”.
Desde o mestre que fala ‘un gallego muy cerrado’ á lubina e gallo que non saben como cando eran robaliza e rapante; desde o home que non fala o galego “porque no te lo sé hablar bien” á moza á que de nena non lle falaron galego por prexuízos e cando chega á universidade ‘namora del’… Desde xaneiro a decembro, 12 meses, 12 temáticas, 12 ideas nas que pensar e outros tantos estereotipos que derrubar.
Pola súa banda, o reitor da UVigo, Salustiano Mato, sinalou que o calendario é “un dos mellores vehículos para potenciar o noso idioma, do que nos sentimos tremendamente orgullosos” e tamén serve para “ridiculizar os múltiples snobismos que seguen a existir a día de hoxe arredor do seu uso”.
Aquí podes descargar o calendario da UVigo ilustrado por Kiko da Silva.
