O James Webb, o telescopio máis caro e potente da historia, volve retratar o universo como nunca antes. O seu último fito: mostrar unha detallada e impresionante imaxe da nebulosa da Tarántula. Grazas a esta fotografía pódense observar miles de estrelas novas, galaxias distantes e as estruturas de gas e po da nebulosa. Todo isto, grazas aos instrumentos de infravermellos do Webb.
O interese científico sobre a nebulosa da Tarántula derívase da súa composición química, similar ás xigantescas rexións de formación de estrelas observadas uns miles de millóns de anos despois do Big Bang. A uns 161.000 anos luz de distancia, esta formación é un exemplo facilmente visible deste período de creación cósmica.
Segundo trasladaron dende a NASA, Webb debería brindar aos astronómos a oportunidade de observar galaxias distantes, pero da era actual, para poder comparalas coas observacións feitas en Tarántula e, así, entender as similitudes e diferenzas. O Webb, que se lanzou ao espazo a finais do ano pasado e as primeiras fotografías apareceron en xullo, abrirá unha nova era de descubrimentos astronómicos.
