O Anak Krakatau (fillo do Krakatoa, en indonesio) naceu pouco a pouco no lugar onde se produciu a gran catástrofe en 1883 que chegou a cambiar as condicións meteorolóxicas en todo o planeta. O tsunami provocado pola explosión da illa chegou a percibirse lixeiramente en Galicia.
Despois da gran explosión, a actividade continuou. O arquipélago de Krakatoa está nunha das zonas volcánicas máis activas do mundo, con erupcións e sismos constantes. Paseniño, o magma construíu unha nova illa, bautizada como Anak Krakatau que sufriu de novo unha gran erupción o pasado mes de decembro. O día 22, un gran deslizamento de terra provocou un novo tsunami que arrasou as costas das illas de Java e Sumatra, entre as que se sitúa Krakatoa. Faleceron centos de persoas (o balance aínda non é definitivo) e milleiros tiveron que desprazarse debido á desfeita causada polo mar.
A erupción do volcán xa comezara meses atrás, e decenas de vulcanólogos profesionais e aficionados levaban tempo documentando o suceso. Dous deles (Øystein Lund Andersen e James Reynolds) tomaron dúas imaxes que evidencian a magnitude do que aconteceu. A saída de magma continúa, e a paisaxe mudou totalmente.
Image-comparison of Anak-Krakatau before and after collapse, showing the major changes to the volcanic Island. First photo captured 5th August and second photo taken by @EarthUncutTV today. 1/3 #AnakKrakatau pic.twitter.com/uXcU3cGydt
— Øystein Lund Andersen (@OysteinLAnderse) 11 de enero de 2019
As cifras aínda non están claras, pero as primeiras estimacións apuntan a que a altura da illa Anak Krakatau reduciuse dos 338 aos 110 metros, e perdeu máis de 150 millóns de metros cúbicos de volume.
Os expertos subliñan, con todo, que é posible que todo comece de novo. Despois do deslizamento, continuará a saída de magma, primeiro cara ao fondo do mar e, pouco a pouco, achegarase á superficie, ata formar de novo unha illa.
Footage from #Krakatau in #Indonesia I shot yesterday and today – remarkable changes at a remarkable #volcano pic.twitter.com/DghbMyIO5B
— James Reynolds (@EarthUncutTV) 11 de enero de 2019
