O Ministerio de Sanidade comunicou este martes que a incidencia media acumulada nos últimos 14 días no conxunto do estado era de 385,65 por 100.000 habitantes. Aínda que a tendencia segue á baixa despois de marcar máximos tras as festas de Nadal, Fernando Simón insistiu en que “estamos afastadísimos do obxectivo de 50 casos de incidencia”.
A Comisión de Saúde Pública, que continúa debatendo desde a mañá deste mércores os novos grupos que serán vacinados na segunda fase da estratexia de vacinación, delimitou outros catro grupos prioritarios, as persoas de 70 a 79 anos, as de 60 a 69 e os enfermos de alto risco de menos de 60, para as que reservou as vacinas de Pfizer e Moderna, mentres que creou outro de poboación xeral de 45 a 55 anos aos que destinará o preparado de AstraZeneca.
Nesta segunda fase que comeza agora, os grupos diana clasificásense en tramos de idade ordenados de maior a menor, aínda que segundo as doses que fosen chegando abriríase a porta para compaxinalos con outros colectivos. Con todo, os plans víronse truncados tras a recomendación de restrinxir a vacina de AstraZeneca ás persoas de entre 18 e 55 anos e isto obrigou a definir antes aos traballadores esenciais.
Por esta razón, aos maiores de 80 reservóuselles as vacinas de ARN mensaxeiro, é dicir, as de Pfizer e Moderna.
En Galicia, segue a baixar a incidencia da terceira onda. A baixada chegou tamén ás unidades de críticos, cuxos ingresados baixan por segunda xornada consecutiva de xeito importante, 18 menos, ata os 187, un 26% menos respecto ao pico da terceira onda, rexistrado o pasado 8 de febreiro con 254 hospitalizados en UCIs.
Este dato, con todo, continúa por riba do pico da primeira onda, cando a principios de abril do pasado ano se alcanzaron os 178 ingresados nestas unidades. Esta é unha das razóns polas que as medidas de desescalada que entran en vigor este mércores en Galicia son, de momento, limitadas.