Esta madrugada, na estación de Pedro Murias, en Ribadeo, o termómetro acadou valores máis altos ca en moitas noites do fresco verán da Mariña de Lugo. Cando xa pasaba da 1 da mañá, e mesmo máis tarde, contra as 5 horas do luns, superáronse os 20ºC en varios puntos do norte de Lugo. Os servizos de meteoroloxía, tanto Aemet como MeteoGalicia, destacaron a singularidade do episodio: a influencia anticiclónica vén acompañada de ventos do sur, máis cálidos, que elevan os termómetros ata rexistros moi pouco habituais, mesmo con récords absolutos desde que se toman datos en varias estacións.
É o caso da cidade da Coruña e as estacións da rede da Aemet nos aeroportos de Alvedro, Lavacolla (Santiago) e Peinador (Vigo), ademais do aeródromo de Rozas (Lugo). Nunca as mínimas foron tan altas como este domingo nos últimos 40 anos.
Uns valores anormalmente altos que se albiscan tamén no mapa da anomalía de temperatura difundido pola Aemet a través das redes. En zonas de Lugo e Ourense, o momento no que fixo máis frío estivo máis de 10ºC por riba do normal para a época do ano.
Outra forma de velo é con este mapa, que mostra a diferenza entre a temp min desta noite e a temp min normal; esta diferenza (anomalía) estivo entre +6 ºC e +12 ºC pic.twitter.com/VtnrgSLC0j
— AEMET_Galicia (@AEMET_Galicia) February 1, 2020
Nalgunhas destas estacións, sobre todo nas máis altas, foron salientables os rexistros máximos xa acadados este luns de madrugada. En zonas como Navia de Suarna, Cervantes ou a serra do Xurés non baixaron dos 10ºC.
En moitos puntos de Galicia subirán dos 20ºC nesta xornada (agárdanse ata 25ºC en Ourense), e as mínimas non baixarán dos 15ºC na Coruña ou Ferrol. A previsión é que para o martes se produza un lixeiro descenso das temperaturas.