Reflexionar sobre a ciencia. Esa é a premisa da que parte o encontro científico 100xCiencia.5: Internacional dimension of science, que reúne esta fin de semana en Santiago de Compostela a máis de medio cento de centros de excelencia científica. O Instituto Galego de Física de Altas Enerxías (IGFAE) será o anfitrión do evento, que xa cumpre cinco edicións. O tema principal do encontro será o papel esencial das grandes infraestruturas internacionais, a cooperación e o intercambio fluído de información na solución dos grandes retos científicos e sociais do século XXI.
Máis polo miúdo, o encontre xorde grazas ao impulso da Alianza SOMMa, os Centros Severo OChos e as Unidades María de Maeztu da Alianza de Excelencia. A Cidade da Cultura será o enclave escollido para a súa celebración, tanto o venres 26 como o sábado 27 de novembro. A este foro acudirán investigadores e directivos dos 57 centros españois con esta certificación de excelencia. Todos eles compartirán espazo con xornalistas e comunicadores especializados co obxectivo de reflexionar arredor da dimensión internacional da ciencia.
Sesións por temáticas
O evento está integrado por catro sesións temáticas: Cosmos, Covid, Crise Climática e Cultura Científica. Todas elas pretenden poñer de manifesto a importancia de dotarse de grandes infraestruturas internacionais, tanto físicas como de comunicación e cooperación, para dar resposta aos retos científicos e sociais de tal envergadura e nos que só as solucións globais parecen viables. Segundo trasladan dende a organización do evento, a pandemia demostrou con toda claridade a necesidade e urxencia de cooperación para atopar unha vacina e resolver problemas que afectan a toda a humanidade.
A inauguración do encontro correrá ao cargo da presidenta da Alianza SOMMa, María Blasco; o conselleiro de Cultura, Educación e Universidade, Román Rodríguez; o reitor da Universidade de Santiago de Compostela (USC), Antonio López; e o director do IGFAE, Carlos Salgado. Amais disto, a directora xeral da Organización Europea para a Investigación Nuclear, Fabiola Gianotti, abrirá a primeira sesión do congreso de xeito telemático. Finalmente, o encontro poderase seguir en directo a través da canle de Youtube do IGFAE, un centro mixto entre USC e Xunta de Galicia, o único con esta distinción de excelencia de toda a comunidade autónoma.
Se queres máis información, podes consultar o programa do congreso na seguinte ligazón.
