Falar de imaxes 3D lembra instantaneamente ao cine e aos videoxogos. Pero máis alá do lecer, este tipo de ilustracións tamén teñen usos científicos en practicamente todos os eidos imaxinables. A xeración sintética de imaxes por ordenador é moi importante na medicina, na educación e na arquitectura, por mencionar tan só algunhas áreas. Na meirande parte dos casos, serven como base para a mellora da vida das persoas. Por exemplo, para facilitar o deseño dunha estrutura e para entender mellor a anatomía humana. Precisamente, a xeración sintética de imaxes por ordenador é no que está especializado o investigador do CITIC José Antonio Iglesias Guitián, protagonista do oitavo episodio de O Descodificador. Este capítulo do pódcast de Gciencia en colaboración co CITIC, que chega á fin da súa primeira temporada, centrarase nos usos científicos das imaxes creadas con intelixencia artificial.
Máis alá de abordar as vantaxes e inconvenientes de usar este tipo de tecnoloxía para a creación de ilustracións, Iglesias Guitián explica en O Descodificador os dous proxectos nos que está inmerso. O primeiro deles, CINEM3D, busca xerar imaxes médicas máis realistas a partir de probas diagnósticas como as tomografías e as resonancias magnéticas. Entre os usos que salienta o investigador do CITIC está un mellor estudo da anatomía por parte dos estudantes e dos profesionais da medicina, así como unha explicación previa á cirurxía máis comprensible para o paciente. O segundo proxecto, URBANSYN, está centrado na condución autónoma e máis especificamente na recreación de mundos virtuais onde non se poñan en perigo as vidas humanas.
Episodio realizado por Laura Filloy
Edición: Carlos Tresandí
Escoita O Descodificador nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
