Imaxinas unha aula de secundaria, con preto dunha trintena de alumnos, pero sen profesor? Imaxinas que quen imparte matemáticas, linguas ou artes non é unha persoa, senón unha máquina? Este escenario é difícil de debuxar, malia que cada vez é máis común debater sobre o impacto da intelixencia artificial na educación. A popularización de ferramentas como Chat GPT ou Midjourney poñen en xaque a veracidade dos traballos académicos, facendo moi complicado que o profesorado saiba distinguir que fixo un alumno e que fixo unha máquina. Pero este non é, nin de lonxe, o único desafío ao que se ten que enfrontar a comunidade educativa a raíz deste brutal cambio tecnolóxico. No sexto episodio de O Descodificador, un pódcast de Gciencia en colaboración co CITIC, abordaremos a cuestión da man do investigador Francisco Bellas.
“As novas xeracións vanse dar de fronte coa intelixencia artificial no futuro laboral”, di o experto da Universidade da Coruña. Esta frase forma parte da análise pormenorizada que facemos da man de Bellas, que afirma contundentemente que a intelixencia artificial debe formar parte do currículo académico dende as etapas educativas máis temperás. A única forma, di el, de usar este tipo de ferramentas é a través da educación. E, por suposto, o profesorado desenvolve un papel fundamental. Debe ser el o que tamén faga uso da intelixencia artificial para ensinar e para aprender, pero tamén debe estar atento aos desafíos dunha tecnoloxía á que aínda nos estamos adaptando.
Episodio realizado por Laura Filloy
Edición: Carlos Tresandí
Escoita O Descodificador nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
