Únete á nosa canle de Whatsapp
A que te refires cando dis que as bacterias falan? Como é iso de perseguir pedras? Que che dixeron os teus pais cando lles dixeches que querías ser científico? As preguntas dos escolares poden ser ás veces un auténtico desafío. E a elas estanse a enfrontar estes días dous mozos científicos galegos, Alejandro Gómez e Andrea Muras, participantes no concurso “Somos Científicos, sácanos de aquí!” un certame estatal que pon en contacto a investigadores de diversas ramas con estudantes de 10 a 18 anos
O concurso, impulsado por Kialo Comunicación e que conta coa colaboración da Fecyt e La Caixa, consiste en que un grupo de investigadores divididos en seis áreas, con seis participantes en cada unha, responden ás cuestións do alumnado (125 clases de toda España) a través de preguntas e chats en directo. Os propios rapaces votan polo investigador que máis lles guste, que será o escollido como gañador de cada unha das súas categorías, recibindo un premio de 500 euros.
Desde o pasado 5 de novembro e ata este venres 16, Alejandro e Andrea manteñen unha intensa actividade que vai alén do seu traballo diario de investigación. Alejandro Gómez, graduado en Xeografía e máster en tecnoloxías de información xeográfica, é investigador predoutoral no grupo Ambiosol da USC, e Andrea Muras, licenciada en Bioloxía e máster en Biotecnoloxía, traballa actualmente como investigadora contratada no grupo de Acuicultura e Biotecnoloxía da mesma universidade.
Alejandro concursa na zona Argon, e preséntase ante os estudantes como un investigador que “inserto sensores en rochas para saber como se moven e analizar cara a onde viaxan”. Animouse a participar no certame cando viu o traballo dun dos concursantes do ano pasado, Pablo R. Ros, e decidiu apuntarse.
Andrea, pola súa banda, está na zona Potasio, e explica así o seu traballo: “Algunhas bacterias precisan falar entre elas para facernos enfermar, así que eu intento entendelas para poder evitar esas enfermidades”. Ela decidiu inscribirse despois de tomar parte nun concurso de divulgación científica o pasado ano. “Era un mundo que non coñecía e que me chamou moito a atención”.
No concurso participan tamén varios colexios e institutos galegos, que envían as súas preguntas
Ademais dos investigadores, en “Somos científicos” participan varios centros galegos: Na zona ‘Cazador de cerebros’, CPI Poeta Uxío Novoneyra de Seoane do Courel e o IES Rafael Dieste da Coruña; na zona Argon, o IES de Poio; na zona Cloro, o IES Punta Candieira de Cedeira; e na zona Potasio, o CPI Ramón Piñeiro da Pobra de San Xiao-Láncara.
Preguntas
Cada clase é un mundo. A Alejandro chamoulle á atención, por exemplo, que houbo moitas cuestións sobre o vulcanismo, ou se era posible que a radiación de Fukushima chegase ás nosas costas. Pola súa parte, Andrea destaca que hai diferenzas debido á distinta idade dos participantes, mentres que as preguntas dos máis novos son máis persoais, as dos estudantes de Bacharelato reflexionan sobre aspectos concretos. “Houbo razoamentos moi interesantes: preguntaban, no caso dunha bacteria que causa gastrite, por que a doenza a padecen só o 25% das persoas se está presente nunha porcentaxe moito maior”.
Ambos coinciden: “Estamos aprendendo moito. É un xeito de contar o que fas dunha forma totalmente distinta, é como saír do laboratorio para explicalo da forma que todo o mundo entenda; é moi enriquecedor”, sinala Andrea. E mesmo, quen sabe, están espertando algunhas futuras vocacións.
Esta semana será a decisiva en “Somos científicos“. A partir deste martes, comezará a creba dos investigadores menos votados, ata o venres 16, cando os que queden disputaranse a victoria”.
