Únete á nosa canle de Whatsapp
En menos de 24 horas, as dúas charlas previstas por Josep Pàmies en Galicia foron canceladas polas entidades que ían ceder os seus espazos para estas actividades. Horas despois de que o Colegio Hogar de Vigo anunciase que non cedería as súas instalacións, a cadena Attica21 decidiu na mañá deste xoves que a charla do naturópata catalán “non se celebrará” no seu establecemento da Coruña. As dúas anulacións chegan despois de que GCiencia recollese as protestas de colectivos como o Círculo Escéptico e numerosas persoas a través das redes sociais nas que se criticaba as afirmacións feitas por Pàmies, que sostén polémicos argumentos contra contrastados avances científicos e médicos. O ano pasado, o Attica21 acolleu a charla do naturópata despois de que o Concello da Coruña e a Universidade negaran os seus espazos aos organizadores do acto.
Les informamos de que la charla de Josep Pàmies, que estaba prevista para el próximo 8 de marzo, no se celebrará en nuestro establecimiento Hotel Attica21 Coruña.
— Attica 21 Hotels (@Attica21Hotels) 15 de febrero de 2018
Nos últimos anos, Pàmies foi imputado por delitos contra a saúde pública ao se lle incautar centos de plantas de cánabo, e ten participado en congresos polémicos como o celebrado este xaneiro en Barcelona, no que algúns poñentes, como Txumari Alfaro, afirmaron nunha das charlas que a mellor terapia contra o cancro de mama era “non facer nada”.
Pàmies avoga por un maior consumo da chamada medicina natural, cultivando e comercializando plantas como a kalanchoe, da que di que ten propiedades antitumorais, mentres ao mesmo tempo pon en cuestión tratamentos como a quimioterapia. Amais, sostén que o ébola ten unha cura “sinxela e barata” e que o VIH non é o causante da sida, tal e como sostén nalgúns dos seus vídeos, posts e charlas por toda España.
