Únete á nosa canle de Whatsapp
A Real Academia Galega de Ciencias (RAGC), coa colaboración da Axencia Galega de Innovación (GAIN) da Xunta de Galicia, acaba de convocar a sexta edición do premio de Xornalismo Científico, que desde esta edición leva o nome de Celia Brañas, unha das pioneiras na incorporación da muller á investigación científica en Galicia, tal e como recolle a súa reseña biográfica no Álbum da Ciencia.
Tal e como destacan as entidades convocantes, “o papel determinante que exercen a ciencia e a tecnoloxía no desenvolvemento económico e o benestar social dun país son a día de hoxe indiscutibles”, polo que “comunicar a ciencia á sociedade galega, facendo partícipe á cidadanía dos achádegos científicos e tecnolóxicos e/ou as súas aplicacións, así como tamén os casos de transferencia de coñecemento ás empresas galegas, convértese nunha prioridade para que ese papel dominante do coñecemento implique a todas/os as galegas e os galegos”.
Á convocatoria poderán presentarse, de xeito individual ou en equipo, os profesionais que desenvolvan a súa actividade en medios de comunicación de Galicia ou en edicións galegas de medios estatais, e que publicaran traballos de de difusión de investigación científica publicado entre o o 1 xuño de 2020 e o 20 de maio de 2021 en calquera medio galego (ou edición galega dun medio estatal): diarios dixitais ou en papel, radio ou televisión.
Estas pezas, que deben responder aos xéneros da noticia, a crónica ou a reportaxe (quedando excluídas as entrevistas e artigos) deberán ter como tema principal calquera aspecto relacionado coa ciencia desenvolvida en Galicia: achádegos, difusión do labor de grupos ou centros de investigación, posibles aplicacións dos resultados da investigación, casos de éxito de transferencia de resultados ao mercado, etc.
O galardón recoñecerá con 3.000 euros o mellor traballo de difusión da investigación científica e concederase un accésit de 1.000 euros ao segundo traballo mellor valorado.
O xurado estará presidido pola Secretaria da RAGC e contará con catro vogais, dúas designadas por GAIN e outras dúas por parte da RAGC, entre as que haberá profesionais de recoñecido prestixio relacionados cos ámbitos da comunicación e da divulgación científica.
O proceso de presentación de candidaturas é telemático, a través dun formulario electrónico dispoñible na web da RAGC a partir do 20 de abril de 2021, data na que se abre o prazo de recepción dos traballos. Unha vez descargado e cumprimentado, o formulario será enviado por correo electrónico a pxornal@ragc.gal, acompañado da documentación complementaria sinalada nel. O prazo finaliza o 20 de maio de 2021.
Máis información no portal da Real Academia Galega de Ciencias.
