Explicación: as numerosas cores espectaculares das nubes de Rho Ophiuchi salientan moitos dos procesos que ocorren aí. As rexións azuis brillan sobre todo pola luz reflectida. A luz azul procedente da estrela Rho Ophiuchi e as estrelas achegadas reflíctese de xeito máis eficiente nesta porción da nebulosa cá luz vermella. O ceo diurno terrestre da Terra aparece azul pola mesma razón. As rexións vermella e amarela brillan sobre todo pola emisión do gas molecular a atómico da nebulosa. A luz das estrelas azuis próximas, máis potente cá da estrela brillante Antares, bate nos electróns arrincándoos do gas, que entón brilla cando os electróns se recombinan co gas. As rexións de cor marrón escura son provocadas polos grans de po, nados nas atmosferas estelares mozas, que bloquean de xeito eficiente a luz emitida por tras deles. As nubes estelares de Rho Ophiuchi, ben diante do cúmulo globular M4 que se olla aquí na parte superior dereita, son aínda máis coloridas do que os humanos poden ollar; as nubes emiten luz en cada banda de lonxitude de onda desde o radio aos raios gamma.
