Explicación: a Lúa dos Cazadores de outubro brilla preto do horizonte, poñéndose máis alá dos arcos da Abadía Whitby nesta desacougante escena nocturna. O luar alumea parcialmente os muros e chans en ruínas da abadía benedictina nun cantíl que mira desde o alto ao Mar do Norte desde a costa inglesa de Yorkshire. Os amadores da novela Drácula de Bram Stoker de 1897 recoñecerán esta abadía maila cidade de Whitby como a localización das costas de Inglaterra nas que naufragou o conde de Transilvania. Alí, o vampiro máis famoso da ficción transformouse nun gran can, choutou á terra e rubiu polo cantíl deica a abadía en ruínas. A impresionante vista de ollo de peixe, unha panorámica de 360 graos, foi creada a partires de 23 fotos unidas dixitalmente.
