Explicación: a grande e fermosa galaxia espiral NGC 6744 ten case 175 000 anos luz de diámetro, máis grande cá nosa propia Vía Láctea. Atópase a uns 30 millóns de anos luz de distancia na constelación meridional do Pavo, aparecendo coma un obxecto estenso e tenue en telescopios pequenos. Vemos o disco do achegado universo illa inclinándose cara a nosa liña de visión. Este retrato galáctico, ben claro e detallado, cobre unha área do tamaño angular aproximado da lúa chea. Nel, o núcleo amarelado do xigante galáctico está dominado pola luz das estrelas vellas e frías. Máis alá do núcleo, os brazos espirais cheos de cúmulos estrelas azuis e noviñas e as rexións de formación estelar rosadas esténdense máis alá dunha galaxia satélite máis pequena na parte inferior esquerda, unha reminiscencia da Gran Nube de Magallaes, galaxia satélite da Vía Láctea.
