Explicación: a uns 60 millóns de anos luz de distancia na meridional constelación de Corvus están a colisionar dúas grandes galaxias. As estrelas das dúas galaxias, catalogadas coma NGC 4038 e NGC 4039, raramente colisionan no curso do esgotador cataclismo que dura centos de millóns de anos. Pero as grandes nubes de gas molecular e po das galaxias si que o fan a miúdo, desencadeando episodios furiosos de formación estelar preto do centro dos refugallos cósmicos. Esta impresionante vista, que abarca uns 500 milleiros de anos luz, desvela tamén cúmulos estelares novos e materia expulsados lonxe da escena do accidente polas forzas de marea gravitacional. A destacada imaxe mosaico foi construída empregando datos de telescopio terrestre Subaru para salientar as febles correntes de marea a gran escala, máis datos do telescopio espacial Hubble cun enorme detalle nos brillantes núcleos. A suxerente aparencia visual das amplas estruturas arqueadas dálle á parella galáctica o seu nome popular: as Antenas.
