Explicación: desde o interior dos límites da constelación Cassiopeia (esquerda) deica Andrómeda (dereita), este mosaico telescópico abarca uns 10 graos nos ceos do planeta Terra. A escena celeste está construída con paneis que son parte dunha exploración da Vía Láctea en luz do hidróxeno alfa en alta resolución. O procesado dos datos monocromáticos da imaxe salientou as estruturas máis febles da zona: os filamentos de gas hidróxeno, relativamente inexplorados, preto do plano da nosa galaxia Vía Láctea. A nebulosa grande e feble Sivan 2, tamén relativamente descoñecida, está na parte superior esquerda do eido. A achegada galaxia Andrómeda, M31, atópase á dereita do centro mentres que as nebulosidades de hidróxeno, tenues e xeralizadas, estrícanse cara M31 por diante do amplo campo de vista. A ampla imaxe da exploración demostra que as intrigantes nubes febles de hidróxeno fotografadas hai pouco polo astrónomo Rogelio Bernal Andreo están realmente dentro da Vía Láctea, ao longo da liña de visión ata a galaxia Andrómeda.
