Explicación: por que hai un óvalo brillante sobre o polo sur de Xúpiter? A Aurora. Na parte máis achegada do seu primeiro pase preto de Xúpiter en agosto, a sonda espacial Juno da NASA rexistrou esta espectacular imaxe en infravermellos dun anel auroral brillante. As auroras son provocadas polas partículas de alta enerxía procedentes do Sol que interactúan cun campo magnético planetario, e os óvalos ao redor dos polos magnéticos son comúns. Os datos da Juno están a dar indicios preliminares de que o campo magnético de Xúpiter e as auroras son abraiantemente potentes e complexas. Por desgraza, un problema informático fixo que a Juno entrara en modo seguro durante o seu último pase preto do xigante xoviano en setembro. Xa se resolveu ese problema, facendo que Juno estea preparada para o seu vindeiro pase sobre as nubes altas de Xúpiter o vindeiro domingo.
