Explicación: a espectacular galaxia espiral M33 semella ter máis cá súa parte equitativa de gas hidróxeno brillante. M33, socia destacada do grupo local de galaxias, tamén é coñecida como a galaxia Triángulo e atópase a uns 3 millóns de anos luz de distancia. O interior da galaxia cuns 30.000 anos luz amósase neste retrato telescópico que salienta as súas nubes avermelladas de hidróxeno ionizado ou rexións HII. As xigantes rexións HII de M33, que se espallan ao longo dos brazos espirais abertos que se arquean cara o núcleo, son algunhas das garderías estelares máis grandes coñecidas, lugares de formación de estrelas de vida curta pero moi masivas. A potente radiación ultravioleta que procede das estrelas masivas e luminosas ioniza o gas hidróxeno que as arrodea e produce finalmente o típico brillo vermello. Para subliñar esta imaxe, empregáronse datos de banda ancha para producir unha imaxe en cor da galaxia, combinados cos datos de banda estreita rexistrados mediante un filtro de hidróxeno alfa. Ese filtro transmite a luz da liña de emisión máis forte do hidróxeno visible.
