Explicación: Xúpiter ten auroras. Coma a Terra, o campo magnético do xigante de gas canaliza as partículas cargadas ceibadas polo Sol cara os polos. Mentres estas partículas baten na atmosfera, os electróns son arrincados temporalmente das moléculas existentes de gas. A forza eléctrica atrae estes electróns de volta. Mentres os electróns se recombinan para reconstruír moléculas neutras, emítese a luz auroral. Na imaxe composta publicada recentemente polo Telescopio Espacial Hubble tirada en luz ultravioleta, as auroras aparecen coma follas anulares ao redor do polo. A diferenza das auroras da Terra, as auroras de Xúpiter inclúen varias raias e puntos brillantes. A Gran Mancha Vermella de Xúpiter pode ollarse no extremo inferior dereita. As recentes auroras de Xúpiter foron particularmente fortes; unha coincidencia afortunada coa chegada da nave espacial Juno da NASA a Xúpiter a semana pasada. Juno foi quen de rexistrar o vento solar mentres se achegaba a Xúpiter, permitindo unha mellor comprensión das auroras en xeral, incluíndo as da Terra.
