Explicación: NGC 6888, tamén coñecida coma a nebulosa do Crecente, é unha burbulla cósmica cuns 25 anos luz de diámetro, inchada polos ventos procedentes da súa estrela central, brillante e masiva. Este definido retrato cósmico emprega datos de banda estreita que aíllan a luz procedente dos átomos de osíxeno e hidróxeno do vento nebular. Os átomos de osíxeno producen a cor azulado-verdosa que semella envolver os pregos e filamentos detallados. No interior da nebulosa pode ollarse a estrela central de NGC 6888, clasificada coma unha estrela Wolf-Rayet (WR 136). A estrela está a sementar a súa envoltura máis exterior cun potente vento estelar, expulsando o equivalente á masa do Sol cada 10.000 anos. Probablemente as complexas estruturas da nebulosa son o resultado deste vento potente que interactúa co material expulsado nunha fase máis temperán. Queimando o combustible a unha velocidade prodixiosa e preto do remate da súa vida estelar, ao final esta estrela debería esgotarse cun estralo nunha espectacular explosión de supernova. NGC 6888, que se atopa dentro da constelación rica en nebulosas de Cygnus, está a uns 5.000 anos luz de distancia.
