Explicación: sobrevivirá a nave espacial New Horizons ao seu achegamento máis próximo a Plutón e enviará de volta imaxes e datos útiles? A humanidade saberao nunhas poucas horas. Independentemente do ben que funcione, a rápida velocidade da New Horizon fará que pase a fume de carozo por Plutón e as súas lúas. O momento do seu achegamento máximo foi ás 11:50 TU (7:50 a.m. EDT). Aínda que para tirar mellor imaxes e datos, a sonda espacial automática foi preprogramada para ficar sen contacto coa Terra á mantenta ata as 1:00 a.m. TU do 15 de xullo máis ou menos, que se corresponde coas 9:00 p.m. EDT do 14 de xullo. Agora, a nave espacial, do tamaño dun piano, comunica de novo coas estacións base na Terra. Con sorte, nese intre, a New Horizons comezará a transmitir datos novos e clarificadores sobre un mundo que ficou remoto e misterioso desde o seu descubrimento hai 85 anos. Arriba publícase unha imaxe composta pola New Horizons da lúa Caronte (esquerda) e Plutón (dereita) tiradas hai 3 días, que xa amosan ámbolos mundos cun detalle sen precedentes.
New Horizons retrata Plutón e Caronte
