Gciencia está hoxe de aniversario. Este sábado fanse dez anos desde que o portal da ciencia galega saíu coa súa primeira edición, nun proxecto entón aínda incipiente pero que contiña todas as grandes claves que o mantiveron activo e cun seguimento crecente durante todo este tempo.
Durante o últimos dez días —un por cada ano de existencia—, Gciencia emprendeu un proxecto de celebración que incluíu o cambio de deseño e unha nova cabeceira. Desde o pasado 16 de decembro, publicáronse entrevistas e tribunas coas principais autoridades da ciencia e as institucións relacionadas con ela. Recuperáronse algúns dos artigos máis destacados desta traxectoria —tamén un por ano— e publicáronse os saúdos en forma de vídeo de decenas de grandes nomes da ciencia, as artes e a comunicación de Galicia, que quixeron sumarse á celebración do aniversario.
Gciencia quere agradecer a todos eles a súa implicación, así como reafirmar o seu compromiso co xornalismo e a divulgación, os dous acenos de identidade deste proxecto nado en 2013 e que afronta o futuro coa vontade de continuar moitos anos máis.
