Equipo do hospital de Santiago recoñecido pola Real Academia de Medicina de Galicia. Foto: Sergas.

Equipo do hospital de Santiago recoñecido pola Real Academia de Medicina de Galicia. Foto: Sergas.

A Academia de Medicina premia un traballo de radiocirurxía do hospital de Santiago

O galardón recoñece o labor dun equipo multidisciplinar do Sergas no tratamento dos Schwannomas, uns tumores do nervio vestibular

A Real Academia de Medicina de Galicia recoñeceu co Premio á Investigación Científica 2017 a un traballo multidisciplinar de radiocirurxía realizado por profesionais da xerencia de Xestión Integrada de Santiago.

O traballo, que leva por título Tratamento Radiocirúrxico dos Schwannomas do Nervio Vestibular. Evolución Clínica e Radiolóxica, é produto dun estudo de 98 pacientes diagnosticados con este tipo de tumor benigno no nervio vestibular (situado no interior do oído), e que foron tratados no CHUS mediante radiocirurxía. Os profesionais conseguiron controlar o volume tumoral en máis do 90% dos casos, sen ter que operar, ata o momento, a ningún paciente por reaccións adversas.

Á vista dos resultados obtidos, consideramos que a radiocirurxía é unha técnica terapéutica de primeira opción para o tratamento dos schwannomas vestibulares ao conseguirse un control do volume tumoral moi alto cun baixo índice de complicacións”, sinala Eduardo Arán, do servizo de Neurocirurxía do CHUS.

Os autores do traballo conseguiron controlar o volume do tumor en máis do 90% dos casos

A técnica da radiocirurxía consiste na aplicación dunha dunha dose de radiación alta e única nun volume tumoral pequeno. No Hospital Clínico Universitario de Santiago de Compostela empezáronse a tratar pacientes ano 2004 con diferentes patoloxías mediante esta técnica. A Unidade de Radiocirurxía está composta por Oncoloxía radioterápica, Neurocirurxía, Radioloxía e Radiofísica.

Amais de Eduardo Arán Echabe, do servizo de Neurocirurxía, asinan o traballo Luis Cascallar Caneda, Ana María Varela Pazos e Paula María Peleteiro Higuero, de Oncoloxía radioterápica; Francisco Gude Sampedro, da Unidade de Epidemioloxía e investigación clínica; e Fernando Vázquez Herrero, Neurorradioloxía e Miguel Blanco Ulla, Neurorradioloxía.

O acto de entrega do galardón, financiado pola Fundación Centro Oncolóxico de Galicia “José Quiroga y Piñeyro” con 6.000 euros, terá lugar este venres 24 de xaneiro ás 19,30 horas na sede da Academia de Medicina.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.