Venres 29 Marzo 2024

Unha páxina na Wikipedia para as científicas pioneiras en Galicia

Nin unha soa das pioneiras da ciencia en Galicia sen a súa páxina de Wikipedia na súa versión galega. A enciclopedia máis famosa da rede é hoxe en día, coas súas limitacións, unha fonte de información clave para moitas persoas. E nisto se basean a Universidade de Santiago de Compostela e a Asociación de Mulleres Investigadoras e Tecnólogas de Galicia (Amit-Gal) para impulsar o martes 20 de febreiro unha xornada que levará o nome de Editatona.

A organización seleccionou unha lista de 85 mulleres que estudaron na USC entre 1910 e 1960

A actividade, que terá lugar na Biblioteca Concepción Arenal – aínda que tamén se poderá participar de xeito virtual – celebrarase de 9 a 14 horas, no marco dos actos de conmemoración do Día Internacional das Mulleres e as Nenas na Ciencia. O obxectivo é editar e mellorar colectivamente as biografías das científicas pioneiras en Galicia, así como as súas achegas.

Publicidade

Para participar é preciso un rexistro previo e hai que seguir unha serie de requisitosque se poden consultar nesta ligazón – co obxectivo de facilitar o traballo e garantir a calidade dos contidos.

A organización da Editatona seleccionou unha lista de 85 mulleres que estudaron na USC entre 1910 e 1960, baseándose na tese de doutoramento realizada pola investigadora Xoana Pintos, doutora en Historia das Ciencias e das Técnicas, e presentada en 2015 baixo a dirección de Ricardo Gurriarán. Nesta lista hai algunhas biografías que xa existen pero das que se propón unha ampliación e/ou mellora (Ángeles Alvariño, Manuela Barreiro, Elisa e Jimena Fernández de la Vega, Antonia Ferrín, Inmaculada Paz Andrade e Olimpia Valencia), así como unha longa relación de científicas formadas na USC e que aínda non teñen a súa biografía publicada na Galipedia.

Outras actividades para homenaxear ás pioneiras

Alén da Editatona, a Oficina de Igualdade da USC e a Biblioteca Universitaria celebran varios actos para visibilizar o traballo das científicas. Desde este mes de febreiro, unha exposición itinerante impulsada coa colaboración do Concello de Santiago que percorrerá varios institutos de secundaria do municipio. A primeira delas rematará no IES Pontepedriña este xoves 15, e a mostra continuará no Xelmírez II (16-22 de febreiro), Antonio Fraguas (23 de febreiro-1 de marzo), Xelmírez I (2-8 de marzo), Eduardo Pondal (9-15 de marzo) e Fontiñas (16-22 de marzo).

Por outra banda, a celebración do Día da Muller na Ciencia tamén entrará no ciclo “Reactiva a túa química”, organizado pola Facultade de Química. Así, este mércores 14, a doutora Xoana Pintos pronunciará a conferencia “Non só Marie Curie” ás 13 horas na Aula Magna da Facultade.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

00:58:19

Victoria Lareu: “O maior hándicap da muller no traballo é ser nai”

A catedrática de Medicina Legal da USC participa na terceira sesión do ciclo 'Ciencia en feminino'

Desigualdade de xénero na ciencia: “En Galicia somos pioneiras pero nunca o puxemos en valor”

As investigadoras Montserrat Díaz-Raviña e Cristina Caruncho denuncian a falta de diversidade, sobre todo no eido da edafoloxía

En directo: Mabel Loza en Ciencia en Feminino

A catedrática de Farmocoloxía da USC Mabel Loza abre este xoves,...

O 8M mira cara ás científicas co ciclo Ciencia en Feminino

GCiencia inicia un ciclo de charlas e debates con recoñecidas investigadoras galegas, ao abeiro da Escola María Vinyals da Deputación de Pontevedra