Únete á nosa canle de Whatsapp
As universidades galegas incorporarán, cando menos, cinco novos doutorados ‘honoris causa‘ no presente ano, segundo as resolucións adoptadas por Vigo e Santiago nos seus últimos consellos de goberno.
A Universidade de Santiago deu o seu visto bo ao nomeamento de Crispian Scully, Enric Trillas, Giorgio Franceschetti e Jean-Michel Uhaldeborde. A concesión desta mención honorífica terá agora que ser ratificada polo Claustro universitario.
Médico, bioquímico e odontólogo, Crispian Scully é unha das persoas máis cualificadas e de maior prestixio mundial no ámbito da odontoloxía en pacientes especiais e da medicina oral. Proposto polo Departamento de Estomatoloxía da USC, destaca a súa xestión á fronte do Eastman Dental Institute, a única institución de Europa dedicada á investigación e docencia exclusivamente para posgraduados, que converteu nun centro internacional de excelencia investigadora.
Pola súa banda, o matemático e catedrático de Ciencias da Computación e Intelixencia Artificial Enric Trillas, investigador emérito do European Centre for Soft Computing, é proposto polo Departamento de Electrónica e Computación “pola súa indubidable valía científica e docente e a súa constante dispoñibilidade a colaborar coa USC en todas cantas iniciativas se lle teñen proposto”.
A poeta e tradutora canadense Erín Moure é bisneta de galegos
Se o Claustro así o aproba, o profesor da Universidade de Nápoles (Italia) Giorgio Franceschetti será tamén nomeado honoris causa, neste caso a proposta do departamento de Física Aplicada. Autoridade recoñecida internacionalmente no campo da teoría electromagnética básica e aplicada, a relación do profesor italiano coa USC comezou nos anos 90 cunha estreita colaboración co grupo de Sistemas Radiantes co que traballa en grupos de investigación de carácter nacional e autonómico.
O catedrático de Economía da Université de Pau et des Pays de l’Adour (Francia) Jean-Michel Uhaldeborde é proposto polo Departamento de Economía Aplicada da USC, co que iniciou nos anos 80 unha relación investigadora coa USC, concretamente coa sección de Facenda Pública. O profesor francés é especialista no campo da economía e as políticas públicas, particularmente nas que se refiren ao desenvolvemento local e o seu financiamento, sendo considerado hoxe unha referencia europea na materia.
No caso de Vigo, o doutorado ‘honoris causa’ aprobado vai para a tradutora e poeta canadense Erín Moure, a proposta do departamento de Filoloxía Inglesa, Francesa e Alemá, e apoiada por sete dos nove departamentos do ámbito. Bisneta de galego, Moure é unha firme defensora da lingua galega, que comezou a aprender en 1998, así como unha destacada tradutora de poetas galegas como Rosalía de Castro, Chus Pato ou Lupe Gómez. Vinculada á Universidade de Vigo desde o ano 2008 a través do Feminario de Investigación Feminismos e Resistencias, Moure converterase tralo apoio unánime do Consello de Goberno na vixésimo quinta Doutor Honoris Causa pola institución académica viguesa e na segunda muller en recibir este recoñecemento.
