Nos últimos anos, non son poucos os estudos que relacionan a posibilidade de que a orixe de doenzas neurodexenerativas como o Alzheimer e o Parkinson estea no sistema dixestivo. En concreto, os focos apuntan cara a flora intestinal, tal e como traballan científicos como a galega Sonia Villapol. E tamén apareceron investigacións nas que se mira cara ao apéndice, a parte final do intestino groso que ás veces ten que ser extirpada pola súa inflamación, a coñecida apendicite. Agora, un novo traballo sementa a confusión, xa que os vínculos parecen existir, pero non nun único sentido.
A finais do ano pasado, unha análise de 1,7 millóns de persoas publicada en Science atopou que, nos casos estudados, había un 25 % menos probabilidades de desenvolver a enfermidade de Párkinson se se eliminou o apéndice. Agora un estudo máis amplo di todo o contrario. Faltan por saber, por tanto, novos estudos, máis precisos e profundos, para extraer conclusións sobre o sentido do vínculo.
O interese dos científicos cara o apéndice vén, entre outras causas, porque nesta zona do intestino hai unha proteína (a-sinucleína) que está relacionada co Párkinson. E deduciuse, alén disto, que o suposto papel protector do apéndice podería desembocar, por outra banda, en que a súa extracción causaría un aumento da a-sinucleína.
Incerteza e máis investigación
Porén, ante as incertezas, son moitos os equipos de investigación que seguen buscando respostas ao problema. E xurdiu entón o que é un dos maiores estudos cuantitativos a nivel mundial para estudar a conexión entre apendicite e Párkinson. A partir dunha base de datos con máis de 62 millóns de persoas, das que 488.000 foran operadas de apendicite e 4.470 delas padeceran Parkinson, fixéronse as comparacións.
Segundo os datos recollidos neste novo traballo, e con meros cálculos cuantitativos, “extraer o apéndice incrementa ata tres veces a posibilidade de padecer Párkinson”. Con todo, son só cifras e, segundo aclaran os autores desta análise, non se pode demostrar a relación directa entre a extracción deste corpo e a doenza. Pero si que se suxire un vínculo que habería que estudar en profundidade.
