A elección da Coruña como sede da Axencia Estatal de Supervisión de Intelixencia Artificial (AESIA) foi posible grazas á implicación de toda a sociedade, as universidades, as administracións e os sectores de actividade, así como o traballo coordinado do Nodo GalicIA, segundo apunta a Xunta de Galicia a través dun comunicado.
Segundo o Goberno galego, a designación de Galicia como sede da AESIA é un recoñecemento aos esforzos do país por situarse na vangarda da transformación dixital, pese ás limitacións de partida relacionadas coas súas características poboacionais e xeográficas. A actual posición de Galicia é o resultado da aplicación de dúas axendas dixitais e, neste momento, da Estratexia Galicia Dixital 2030 (EGD2030).
Precisamente, o eixo transversal da EGD2030 refírese á especialización de Galicia no coñecemento e na aplicación das tecnoloxías. A instalación da AESIA no país cumpre e reforza os obxectivos de atraer infraestruturas e entidades de referencia, así como de reter e atraer talento dixital.
A designación da sede en Galicia supón o cumprimento por parte da Xunta de Galicia do mandato recibido en maio do Parlamento para a promoción dunha candidatura galega. Esta tarefa foi encomendada ao Nodo GalicIA, formado pola Xunta, as tres universidades públicas e a Eurorrexión.
Intelixencia artificial fiable e humanista
A Xunta destaca que o Nodo GalicIA foi quen de traballar con obxectividade para a selección da mellor candidatura galega e os seus integrantes amosaron criterio e xenerosidade para aceptar unha decisión de carácter técnico e obxectivo que agora se comproba que era a acertada.
Coa sede da Axencia, Galicia introdúcese de cheo na estratexia europea cara ao liderado mundial nunha intelixencia artificial fiable e de valores humanistas. A AESIA será a primeira das axencias que se creen en Europa e deberá marcar o camiño a seguir por todas as demais.
Estes obxectivos europeos coinciden cos establecidos por Galicia na Estratexia Galega de Intelixencia Artificial e reforzados por iniciativas como o estudo das tres universidades promovido pola Xunta para analizar o marco ético e normativo axeitado para ese enfoque europeo da IA.
